[dropcap]Н[/dropcap]оябрь зурул 17-нний Республикалул Национал библиотекалуву хьунни терроризмалул ва экстремизмалул идеологиялийн къарши бацIаву

мурадрайсса «Дяъви бакъасса дуниял» тIисса цIанилусса суратирттал ва луттирдал выставка.Мунил автор ур гьунар бусса художник, публицист, шаэр, журналист Марат ХIажиев.
Мукунма выставкалул сакиншинначиталну бия ДР-лул Миллатирттал политикалул ва Культуралул министерствартту.

И. Саидова
[dropcap]Ш[/dropcap]адлугърал даражалий выставка тIитIлатIисса даврий гьурттушинна дунни ДР-лул миллатирттал политикалул министр Татьяна Гамалейл, ДР-лул печатьрал ва информациялул министр Рашид Акавовлул, Республикалул бакIчинал маслихIатчи, АТК-лул эсперт советрал секретарь Камил Ландал, республикалул жяматийсса ишккаккултрал, культуралул ва искусствалул ведомстварттал вакилтурал, студентътурал, дуклаки оьрчIал ва творчествалул интеллигенциялул.

Мажлис бачин бувну бия искусствовед Мариян Чалабова.
Выставка тIитIаву барча дуллай, Марат ХIажиевлул дурсса даврин лавайсса кьимат бишлай, Татьяна Гамалейл увкунни:
— Вай суратирттах бурувгун, ялун нанисса никираща ва цума-цагу инсаннаща бюхълай бур, цала бучIантIимуния пикри бувну, бяйкьу ххуллийн къабагьну, терроризмалул ва экстремизмалул идеологиялийн къарши бацIан, — куну.
Цала ихтилатраву Рашид Ака­­вовлул кIицI лавгунни суратирттайсса лахIзарду халкьуннан абадлий дакIний личIан­тIишиву.
— Вай суратирттал оьсса лахI­зарду хъанахъиссар жула оьр­мулул яла якьамами кьинирдуну. Умуд бур утти республикалий хъанахъимур хъин чулийнмай­сса хьунссар тIисса. ЧIа тIий ура авторнан гихуннайсса давриву тIайлабацIуртту, — увкунни Рашид Акавовлул.
— Терроризмалул ва экстремизмалул идеологиялул ххуллу кьукьаву мурадрайсса выставка тIитIаву – му буниялагу хъуннасса агьамшиву дусса давур. Ихтияр дуруччай органнал зузалтрал терроризма дух даннин ялугьлан къабучIиссар. Цуппа ца билаятраща уттинин гужирдал структурардайхчIин бат дан къабювхъуссар терроризм. Так жяматрал гужру цачIун бувнур му балаллуща ххассал хьун бюхъантIисса. Мунияту, цинявн­нахь тавакъю буллай, оьвтIий ура ва масъалалул лагма цинявппа лагаву, — увкунни Камил Ландал.
Марат ХIажиевлул цала ихтилатраву кIицI лавгунни ва выс­тавка жагьилсса никиран хас дурну душиву.
— ТIайлассар, ва ттул дакIнил яла ларсмур темагу дакъар. Вай ишру сававну инсантурал бакIурдичIан чIявусса баларду бувкIссар. Мунияту ттун ччан бивкIунни жула оьрчIру укунсса иширттая махъаллил баву мурад­райсса выставка дуван, — увкунни ванал.
Выставка ххал дурну махъ, хьунни «Кавказский экспресс» тIисса Марат ХIажиевлул цIуну итабавкьусса луттирал презентациягу. Маратлул бувсунни ва луттиравун цачIун бувну бушиву Аьрасатнал личIи-личIисса билаятирттаясса 150-нния ливчусса автортурал прозарду, шеърирду, таржумартту ва художниктурал иллюстрацияртту. Авторнал цала луттирду пишкаш бунни МахIачкъалаллал ва Кас­пийскаллал школарттал библиотекарттан.