Асланбаглул арс МахIаммадов ХIасан
Вай гьантрай дунияллия лавгунни 1-мур ЦIувкIратусса захIматрал ветеран, ххаллилсса зунтталчу, щалва оьрму банкрал давурттай гьан бувсса итххявхсса финансист ва каялувчи, Асланбаглул арс МахIаммадов ХIасан.
Увссар ХIасан 1931 шинал 1-мур ЦIувкIрав. Финансистнал кIулшивурттугу ларсун, захIматрал ххуллу байбивхьуссар Хасавюрт шагьрулул налогирттал инспекторнал даврия. Лаккуйн зана хьуну махъ зий ивкIссар Ккуллал райондалул Сберкассалул хъунаману, Госбанкрал райондалийсса отделданул управляющийну. Пенсиялийн укканнингу зий уссия банкрай каялувшиву дуллай. Райондалий ХIасан къакIулсса инсан акъассия, цалла даву ххуйну кIулсса финансист ва каялувчи хIисаврай мунал хIурмат буссия, сийлий уссия. ХIукуматралгу ХIасаннул даврин ххуйсса кьимат бивщуссия, тамансса бахшиширттан ва хIурматрал грамотарттан лайкь хьуссия. Дуллуссия ХIасаннун Дагъусттаннал обкомрал чулухасса, Дагъусттаннал ПаччахIлугърал Советрал председатель МахIаммадаьли МахIаммадовлул цIаниятусса ХIурматрал грамотарттугу.
ХIасан уссия пар-пар тIий марцIну янна лаххайсса интеллигент, хъудугьул дуваймур карчI къадурну дувайсса захIматчи, лакку кIану ххирасса патриот, яхши-хаш ххуйсса, шяраваллил жяматращал хIал бавкьусса, оьнийгу, хъиннийгу шайкун жяматрал иширттачIа ацIайсса шяравучу. Кулпат Жамилатлущал, ларайсса кIулшивурттугу ласун бувну, чивун буккан бувссия 3 арс ва 3 душ. Цаппара зурдардил хьхьичI дунияллия лавгсса хъунама арснаяр Низаминаяр махъун къаагьну лавгунни цувагу.
ХIасан дунияллия лагаврил кьурчIишиву кIидачIлай, жижара буллай буру кулпатрахь, арсурваврахь, душваврахь, миннал наслулухь, уссихь, ссихь, гъан-маччацириннахь.
ХIасаннул рухI бигьаний дишиннав, Алжаннул ххари уваннав, ванан къабуллумур оьрмулул бутIа наслулун ххибувну лякъиннав!
1-мур ЦIувкIуллал жямат
Халиллул душ Къунжуева Асият
Хъун бакъасса хIаллай къашавайгу бивкIун, захIмат-жапасса цIуцIаврища ххассал бан къавхьуну, оьрмулул 67 шинаву аьпалухьхьун лавгунни ххаллилсса багьу-бизулул хъамитайпа, дакI-аьмал уздансса, гьарцаннащал хIал бавкьусса инсан, Ххюлуссуннал шяраватусса Халиллул душ Къунжуева Асият.
Асият бувну бур 1950-кусса шинал. Бувккуну бур Гъумучиял дянивмур даражалул школа. Ванил захIматрал ххуллу байбивхьуну бур Лакрал райондалул ДахIаврил узелданий телеграфистнал даврия.
Муния махъ 16 шинал мутталий Асият зий бивкIссар Лакрал ва Ккуллал районнал КГБ-лул идаралул даврий. Махъсса шиннардий зий буссия Лакрал ва Оьруснал театрдал давурттай.
Асият аьпалухьхьун лагаврил пашманшивугу кIидачIлай, дакIнихтунусса жижара буллай буру ванил ласнахь Сяъдуллагьлухь, арсурваврахь Мурадлухь ва Маратлухь, душнихь Ларисахь, куявнахь Русланнухь ва махъсса щалагу агьлу-авладрахь.
Асиятлул бунагьирттал аьпа баннав, рухI бигьаний дишиннав.
Ххюлуссуннал
ва Гъумучиял жямат
Хъуннасса кьурчIишиву кIидачIлай, дакIнийхтуну жижара буллай буру миллатрал яргсса душ, ххаллилсса лакку хъамитайпа, жяматийсса ишккакку, Лакрал театрданулгу вихшаласса дус,
ЧIибил душ Мариян Илиясова
жуятува личIи шаврийн бувну, ванил кулпатрахь, уссурссуннахь, гъан-маччанахь, щалвагу лакрал жяматрахь.
Цил гьав нурданул дуцIиннав, Пирдавс-алжан нясив баннав. Махънал оьрмурдай барачат бишиннав. Амин!
А. Къапиевлул цIанийсса Лакрал музыкалул
ва драмалул театрданул зузалт
Оьрмулул 74 шинаву, мадара хIаллай къашавайгу бивкIун, аьпалухьхьун лавгунни ххаллилсса, дакI-аьмал хIалимсса зунттал хъамитайпа,
ЧIибил душ Илиясова Мариян
Ва бия лакрал миллатгу, буттахъал улчагу дакIнийхтуну ххирасса инсан. Ванил хъинну чIярусса ххуй-ххуйсса давуртту дурунни буттал шяравугу, лакрал махIлалийгу.
Марияннул бивкIу ххишала бакъа асар хьунсса бия, ца ГьунчIукьатIран бакъагу, ва кIулсса гьарца инсаннангу. Сагъну бунува цилла цIа абад дурунни Марияннул. ГьунчIукьатIрал жяматрачIа дакъагу, щалагу Дагъусттаннай хIурматрай личIантIиссар Марияннул цIа.
Марияннул бивкIулул кьурчIишиву кIидачIлай, жижара буллай буру ванил уссихь Нажиблухь, ссихь Сарижатлухь, ласнахь Сиражуттиннухь, арсурваврахь Маратлухь, Мираблухь, Морислухь, душнихь Динарахь, цинявппагу гъан-маччаминнахь.
Цин алжан нясив баннав, рухI бигьаний дишиннав. Ванин бакъамур оьрчIан булуннав.
ГьунчIукьатIрал жямат
