[dropcap]У[/dropcap]ттигъанну МахIачкъалалия Дарбантлив ияйхтува бакIрайн агьуна ттула дус Тахмираз Имамов. Ва ттун ччянива 1976-ку шиная шинайва, кIулсса ва дусъсса инсанни.

ХIажимурад ХIусайнов
[dropcap]Т[/dropcap]ахмираз ур Дарбантуллал райондалийсса МитIагьи-Къазмаляр шяравасса азирбижан инсан. Жу га цIана, дарбантуллал аьдатрай, чяйханалувун лавгун, хаварду буслан бивкIссияв. Тахмиразлул ттухь га цIана: «На вихь лап ххуйсса хавар бусанна цал», — куна. Нагу уссияв цива-ци хавар бурвав тIий. Ххал барча, Дагъусттаннал тарихраха ва литературалуха зузисса инсантураву цалчин мукьа Дагъусттаннал азирбижаннал шаэртал Аьрасатнал Чичултрал союзравун кьамул бувну бия: Тахмираз Имамов, ТIагьир СалихI, Пахруттин Уруджев, Зай­наб Дарбандли.
Тахмиразлул къуртал був­ссар Дарбантуллал педучилище ва Дагъусттаннал пединститут. Зий ивкIссар цала шяраву учительну, Дарбантлив буккайсса республикалул лагрулийсса азирбижан мазрайсса «Дэрбэнд» тIисса кказитрал хъунама редакторну. ЦIана зий ур «Дербентские известия» тIисса кказитрал отделданул редакторну. Чичайссар азирбижан ва оьрус мазрайсса шеърирду.
ТIагьир СалихIгу ттун кIулсса инсанни. ТIагьир увну ур Азирбижаннаву, къуртал бувну бур Челябинскаллал культуралул институт. Зий ивкIссар «Дагестан» ГТРК-лий азирбижан мазрайсса радиолул редакторну, Дарбантливсса Азирбижаннал театрдануву, цIана зий ур «Дэрбэнд» кказитрай. Итабавкьуну бур шеърирдал 4 лу.
Пахруттин Уруджевгу ур Тахмиразлул шяравасса. Ванал къуртал бувну бур Дарбантуллал педучилище ва Дагъусттаннал пединститут. Зий ивкIссар цала шяраву учительну, Дарбантливсса институтирттал филиаллай, жугьутIнал мазрайсса «Ватан» кказитрал корреспондентну. Итабавкьуну бур шеърирдал ва насрулийсса чичрурдал луттирду.
Зайнаб Дарбандли ттун кIулсса инсан бакъар, мунияту вания цичIав бусан къахьун­ссар.