Щалагу билаятрай кIицI лаглагисса Виваллил иширттал органнал зузалтрал байрандалун хасну ЦIуссалакрал райондалул актовый залдануву хьунни шадлугърал мажлис. Микку гьуртту хьунни ЦIуссалакрал райондалул бакIчи ХIажи Айдиев, ванал хъиривчу Гъаирбаг Мусаев, ЦIуссалакрал райондалул ОМВД-лул хъунама Марат МахIмудов, ДР-лул Халкьуннал Мажлисрал депутат Амирхан Амирханов, Райондалул судрал председатель ХIамзат ХIамзатов, ЦIуссалакрал райондалул полициялул зузалт ва ветерантал, бусравсса хъамал.
[dropcap]Ш[/dropcap]адлугърал мажлис тIитIлай, Марат МахIмудовлул барча дунни полициялул зузалтрал байран.
Райондалул виваллил иширттал органнал зузалт мукунма байрандалущал барча бунни ХIажи Айдиевлул.
Райондалул бакIчинал дакIний личIансса бахшиш дунни ОВД-лул хъунаманан ва райотделданул зузалтран. Полициялул зузалт барча буллалисса ихтилат бунни Амирхан Амирхановлулгу.
Давриву ххуйсса ккаккияртту чIалачIи дурсса хьхьичIунсса зузалтран ва кьини дуллунни хIурматрал грамотартту, барчаллагьрал чагъарду, ларайсса чинну.
Къуллугърал буржру биттур буллай жанну дуллусса зузалтрал кулпатирттан дунни арцуйнусса бахшишру.
Ахирданий, хъатру ришлай, сахIналийн буккан бувну, лахъа-хъун бунни полициялул зузалт.
Мажлис къуртал хьуну махъ, цинявппагу бувккун, тIутIив дирхьунни къуллугърал бурж биттур буллай жанну дуллусса зузалтрал гьайкалданучIа.
А. Аьбдуллаева
