[dropcap]М[/dropcap]оскавлив яхъанахъисса Разита Мушидовал инсаннал ихтиярду дуруччаврилсса буллалисса комиссиялул член хIисаврай Москавлив хъин хьун бувкIсса дагъусттанлувтуран гьантта бикIансса кIану буллай бикIу,морграва жаназа ласун ва самолетрай тIайла дуккан кумаг буллай бикIу, биялсса хIарачат бувссар.Уттигу, 40 шинавусса ХIажимурадлул жаназа Москавуллал морграва ласун къахъанай, цивппа авара бувайхту, мунал гъан-маччами Разитайн бувккун бур.
П. Рамазанова
— Сайки 10 гьантта хьуну бия ХIажимурадлул гъан-маччанаща моргравату жаназа ласун къахъанай, Дагъусттаннай тIурча, гьавгу дурккун, жямат ялугьлай, – буслай бур Разита телефондалувух. – Жагьил дуснакьраву накьлу хьуну ия, цукун ивкIуссаривгу кIулну бакъая, мунияту гъан-маччами, ХIажимурад азарханалийри чавай, дуснакьравувар чавай, ххуллу-кIану къакIулсса инсантал, хъунмасса мегаполисрал инстанциярттайх буклаки бувну бия. Сайки 10 гьантта хьуну бия жаназалул морграву. Полициялул майор Валентин Лапшовлул кумаг бувну, жун жаназа ляркъуна, хьхьурайсса рейсрай самолетрай тIайла дуккан бювхъуна Дагъусттаннайн. Укунсса иширттая хавар бухьурчагу ттунма, на цал уттигу инсантурал ихтиярду ссуссукьу дуллай бушиврул бара хьунна. ХIажимурадлул маччачу Аьбдулла Жабраилов буслай ия цалва миннатрах цукунчIавсса къулагъас дуллай къабивкIшиву, цала маччачу цукун ивкIуссарив, чув уссарив къабуслай, азурда бувшиву ва, жаназа дусса кIану кIул хьуну махъгу, пулансса документру батIияра тIий, тIайланма арцу тIалав дуллай бивкIшиву. На ва иширал хъирив бизайхту, арцул хIакъиравусса ихтилатругу кьукьин бувна, мурадгу щаллу бувна, — буслай бур ва.
Разита Мушидован цимилагу бюрократизмрал дайшишрурдащал талангу, инсантурал чарил дакIурдивун кьутIа тIунгу багьай, амма мунин мукунсса дайшишрурдая нигь дакъар, аьдат хьуну бур ва буниялттунгу ххарину бур цуппа агьалинан кумаг буллан бюхълай бушиврия.
«Къумасса иширавун цучIавгу къаагьаннав, амма, хьун бумур хьуну махъ, бан-бит бакъа, къазразанну ливчIсса инсантуран кумаг аьркинсса ппурттуву, ттущава миннал мурад щаллу бан хьурча, дакI паракьат шай», — тIий бур Разита Мушидова.
ЧIа учинну ванин цIуллушиву ва дуллалимуниву тIайлабацIу.
