Халкьуннащалсса хьунабакьаву

[dropcap]О[/dropcap]ктябрь зурул 30-нний «Единая Россия» партиялул Дагъусттаннал Региондалийсса приемныйлуву агьали кьамул бунни Федерал Мажлисрал ПаччахIлугърал Думалул депутат Аьвдулмажид МахIрамовлул.


Депутатнал цалчин кьамул унни «Лотос» тIисса цIуллу-сагъшиву дуруччаврил ва спортрал комплексрал директор МахIаммадтIагьир Эскендеров. Ванал бувсунни республикалий цIуллу-сагъшиврул ссуссукьушиву дусса оьрчIансса бувагу бусса ца реабилитациялул центрданул къайгъурду цала хIарачатрайну щаллу буллай ушиву. Къашавайсса оьрчIансса лагерь зий бур так гъинттулсса чIумал. Мунияту, лагерьданийсса оьрчIансса шартIру дузал даву мурадрай, дан аьркинну дур тамансса давуртту. МахIрамовлул, ванал пикрилуцIунгу авкьуну, бувсунни цува хIала-гьурттуну зун хIадурну ушиву.
Хъунзахъиял райондалиясса «Баракат» КФХ-лул хъунама Сайбулла Гитинов увкIун ия цала аьнакIал фермалун «Газель» машина тIалав бан кумаг бара тIий. Ванал бувсунни цачIара диялсса аьнакIал ферма душиву ва шиккун корма, щин ва цаймигу кьай-кьуй ххилансса машина аьркинну бушиву. Депутатнал цала кумагчинайн тапшур бунни ва масъала Шяраваллил хозяйствалул министерствалул дачин дурсса ишбажаранчитурал чIарав бацIаву ва фермер хозяйствартту хьхьичIуннай даву мурадрайсса программарттайхчIин щаллу баву.
Индира Раджабова аьрзирай бия цийва ттукIрахсса бурж ялув буллай бушиврия. Ванил бувсунни, цуппа зуруя зуруйн коммунал хIаллихшиннардахсса арцу дуллай бунагу, махъсса зурдардий ттукIрахсса бурж чивчуну бушиву, ккаккан дурну уттининсса цинярдагу квитанциярттугу, миннат бунни ва ишираву тIайлашиву дан кумаг баву. Депутатнал гава ссят, «Махачкалагорэлектросети» ОАО-лул каялувчи АхIмад Оьмаровлуйн оьвкуну, тIалав бунни аьрзирай бувкIсса хъамитайпа кьамул баву ва мунил масъалалул хъирив лаяву.
ЦIуссаккуллал райондалиясса ЦIуссаккуллал шяравасса, къуллугърал бурж биттур буллай оьрмулуцIа хьусса полковникнал кулпат Миясат Рамазановал чулуха бувкIунни аьрщи зана ритан кумаг бувара тIий миннат буллалисса чагъар. Цила ласнан дагьлай диркIсса аьрщи ванища уттинин ласун бювхъуну бакъар. Ва масъала Республикалул ПрокуратуралийхчIин ххал бигьин тапшур бунни МахIрамовлул.
ДепутатначIан мукунма бувкIун бия давурттал дузал баврил, Ленинккант поселокрай футболданий буккайсса майдан буван кумаг баврил ва цаймигу масъаларттал хIакъиравусса инсантал. Ва кьини депутатнал кьамул унни 13 инсан. Агьалинал буруккинттах вичIигу дирхьуну, ми масъалартту щаллу баву мурадрай, тIайла бувккунни депутатнал чулухасса чагъарду.

И. Саидова