[dropcap]О[/dropcap]ктябрьданул 27-29-нний, Буйнакскаллал райондалий Буг­лайннал шяраву, хьунни лачIун буккаврил ДР-лул Халкьуннал Мажлисрал Председатель Хизри Шихсаэдовлул завардансса Щалвагу Аьрасатнал 14-сса тIиртIусса турнир.

[dropcap]Т[/dropcap]урнирданий гьуртту хьунни 212 лачIунукку. Уттинин хьу­сса турнирдай вайксса чIявусса спортсментал гьуртту къашай­ссия.
Дагъусттаннал лачIун­буккулт­раяр ххишала, турнирданий гьуртту хьунни Ухссавнил АьсатIиннал, Ингушетиянал, Санкт-Петербургуллал, Волгоградуллал, Краснодардал улк­рал, Башкириянал, Къабардин-Балкьарнал лачIунбуккулт, мукунма Азирбижаннал, Къазахъисттаннал, Къиргъизнал, ТаджикIисттаннал, Узба­кIисттаннал, Кьиблалул Аьса­тIиннал ва Перуллал спортсментал.
Турнир тIитIаврий махъ лахълай, Буйнакскаллал райондалул бакIчи Камил Изиевлул увкунни: «Турнир дуллалиссаксса шиннардий ва хьунни Буйнакскаллал райондалул яла хъунмур ишну. Жу ххарину буру жучIанма вайксса хъамал бучIаврия. Хъамал ххира­сса жул райондалул цинявннахь барча тIий бур ва ххаллилсса турнир тIитIаву. Цинявннан чIа тIий буру ххувшавуртту».
Хъирив ихтилат бунни республикалул физкультуралул ва спортрал министр МахIаммад МахIаммадовлул. Мунал республикалул каялувчитурал ва цала цIанияту циняв турнирданийн бувкIминнахь барча кунни ва хъуннасса шадлугъ дайдишаву. Турнир тIитIаврил лагрулий Буйнакскаллал райондалий спортраву хьхьичIуннайшивуртту дурминнан дуллунни наградарттугу. Наградартту дуллунни Аьрасатнал лайкь хьусса тренер Шамил Хуталиевлул (лаккучури) ва Ингушетиянал лайкь хьусса тренер Умар Хаблиевлул.
Ухссавнил АьсатIиннал спортрал министрнал цIанияту Хизри Шихсаэдовлун барчаллагьрал чагъар буллунни АьсатIиннал спортрал делегациялул каялувчи Валик Тедеевлул.
Турнирданий ххув хьунни дагъусттанлувтал Дини­слам Тахтаров (57 кило), Расул МахIаммадов (97 кило). Азирбижаннал командалува ххув хьунни Муртазяли Муслимов (74 кило), Азирбижаннахлу уклай ивкIсса дагъусттанлув Жамалуттин МахIаммадов (125 кило). Къаяккантуллал райондалиясса Шихсаэд Жалилов (65 кило) ва МахIачкъалалиясса Даурен Куругълиев (86 кило).
Гьашину Европанал чемпион хьусса Д. Куругълиевлун буллунни «Киа Рио», Ш. Жалаловлун – «Лада Веста» машинартту.