[dropcap]Н[/dropcap]оябрь зурул 11-нний Щурагь жул, ЧIяйннал, чIирисса диаспоралул батIаву хьунни. Мунил сававгу хьунни МахIачкъалалия жучIан хъамалу Шалласу Шалласуев учIаву. Ва увкIун ия Щурагьсса ЧIяйннал жяматрал активистурал цала бакIцIуцIаву дурну итабавкьусса «Помним, любим, гордимся!» тIисса луттирду бахшиш бан.
[dropcap]Ю[/dropcap]суп Юсуповлул хIукмулийну хьунабакьаву дарду жула лаккучунал кафелуву. Шиккун бувкIун бия диаспоралул хъунама цува Юсупов Юсуп, Пирбудагъов Аьбдул, ХIабибуллаев Бакри, ХIусманов МахIаммад, ХIасанхIусайнов ХIасанхIусайн, Бугъраев Аьли. Шалласущал МахIачкъалалия увкIун ия жула шяраватусса ишбажаранчи Мамедов Артур.
Шалласул ЧIяйннал школалун 100 шин шаврих цIа кусса лу итабакьин барчаллагьрай кIицI лавгуна ка-кумаг бувсса инсантурал цIарду.
Шалласул бувсуна цала оьрмулул ххуллия, бувсуна ЧIяйннал школа къуртал бувсса лакрал ишбажаранчитурая ва цайми миллатирттал гьалмахтурая. Ххюра шин ларгун дур ва лу итабакьин. Хъунмасса барчаллагь тIий ия Шалласу шяраваллил ишбажаранчи Оьмаров МахIаммадлуйн, лу сакин буллай чIярусса материаллу рартIсса.
Мажлисрай гьуртту хьусса гьарица инсаннал ЧIяйннал шяраваллил багьу-бизулия ихтилат бувна. Ихтилат хьуна Совет Союзрал Виричу ЦIаххуй Маккаевлун бюст бацIан баврия, лакрал, ЧIяйннал жяматравасса бюхттулсса наградарттан лайкь хьусса дяъвилул участниктурая – Ибрагьимов Илияслуя, Кьурбанов Идрислуя, Усттаров (Кузнецов) Рамазаннуя, ХIанапиев ХIабиблуя. Пирбудагъов Аьбдуллул бувсуна Шалласугу, цувагу мюрщинияцIава цаннацIух ца бивкIшиву, Шалласу дуккавриву ва жяматийсса давурттаву хьхьичIунну ивкIшиву.
Хьунни ихтилат ниттил мазрал хIакъиравугу. МахIаммад ХIусмановлул бувсунни цува ЦIусса Гадари тIисса яруссаннал шяраву зий ушиву, шяраваллил жяматрал цала яру мазрай бакъа ихтилат къабайшиву, школалий 4-мур классравун бияннин дарсру ниттил мазрай душиву.
Шалласул бувсуна, Лакрал театр Дянивмур Азиянавун лавгсса чIумал, цукун ххаллилну хьунабавкьуссарив ми тийх. Щурагьсса ЧIяйннал ккурандалул хъунама Юсуплул барчаллагь увкунни цащала хьунаакьин увкIсса Шалласухь, гьарца ишираву ванал чIарав бусса кулпат Насибатлухь, ванащал архIал увкIсса Артурдухь, кафелул заллу Камиллухь.
Хъирив, цинявппа шагьрулувун бувккун, суратругу рищарду.
Шагьру Шалласун жуярва ххуйну кIулну бия.
— Шикку укунсса музей буссия, театр буссия, тикку гимназия буссия, — тIий, буслай ия. Ванан кIулну бия шагьрулий циксса ва часса лак бивкIссарив. Бувсуна шагьрулийн Дюма увкIун ивкIсса, мунал бяълилул багъирттай тамаша бувсса.
Щурагьсса ЧIяйннал
жяматрал ккурандалул
чулуха МахIаммад ХIусманов
