Халкьуннал тарих ва культура ядаву мурадрай

Ноябрь зурул 3-нний Дагъусттаннал 4 шагьрулий, тарихрал ва культуралул акциялул лагрулий, чирчунни этнография ла­хьхьаву мурадрайсса диктантру. Республикалий этнографиялул диктантру чичавривух гьуртту хьунни 800-нния ливчусса инсантал.

И. Саидова
Ва акциялун хас дурсса диктант чичин Дарбант шагьрулийн, Нарын-Къалалийн, бувкIун бия ДР-лул Халкьуннал Мажлисрал депутатътал, муниципалитетир­ттал хъуними, личIи-личIисса идарарттал каялувчитал, машгьурсса спортсментал, жяматий­сса иш­ккаккулт, журналистал.
Этнодиктантрал гьурттучитуран 30 журасса тестирдаву ккаккан дан багьлай бия цалла кIулшивуртту. Миннува 20 тест бия щала билаятрал гьурттучитуран аьмсса, ливчIми 10 суал бия Дагъусттаннал тарихран хас бувсса. Диктантрал хIасиллу кIул хьунтIиссар ноябрь зурул 12-нний.
Диктант чирчуну махъ гьур­ттучитурал бувсуна ва агьамсса даврил хIакъиравусса цала пик­рирду. ДР-лул кIулшивуртту дулаврил ва элмулул министрнал бигарду чIумуйну биттур буллалисса Шагьаьппас Шагьовлул кIицI лавгунни, ва ляличIинува жагьилтуран мюнпат бусса акция хъанахъишиву.
ДР-лул миллатирттал политикалул министр Татьяна Гамалейл бувсуна диктантравусса заданиярттая.
Дагъусттаннай ва акция сакин дурсса, Москавливсса Ккавкказуллал клубрал каялувчи Шамил ЖахIпаровлул кIицI лавгунни диктант чичин язи бувгьусса Дарбант шагьру респуб­ликалийгу, Кьилвалул Аьрасатнавугу хъуннасса агьамшиву дусса кIану хъанахъишиву.
Дарбант шагьрулул мэр Малик Багълиевлул бувсунни цува хъиривмур шиналгу укуннасса давривух гьуртту хьун хIадурну ушиву.
Шиккува бусан, этнография лахьхьаврин хас дурсса диктантру чирчуссар Дарбантлив, МахIачкъалалив, Къизлардай ва Буйнакскалий.
Диктант чичавриву гьур­тту хьун къабювхъуминнаща хьунтIиссар Щалагу Аьрасатнал акциялул сайтрайсса тестрал заданиярттайхчIин цалла кIулшивуртту ххал дан.