Ноябрь зурул 15-нний МахIачкъалалив шадлугърал даражалий тIиртIунни Миграциялул управлениялул цIусса къатри.
А. Аьбдуллаева
[dropcap]М[/dropcap]икку гьурттушинна дан бувкIун бия ДР-лул виваллил иширттал министр, полициялул генерал-лейтенант Аьбдурашид МахIаммадов, мунал хъиривчу, полициялул генерал-майор Сергей Карпов, Аьрасатнал МВД-лул Миграциялул агьаммур управлениялул хъунмур, полициялул генерал-майор Ольга Кириллова.
Бусравсса хъамаллуран цIусса къатри ккаккан дунни Дагъусттаннал Миграциялул управлениялул хъунама МахIаммад МахIаммадовлул.
Шикку бур гьарта-гьарзасса, чаннасса 4 зал, агьалинал паччахIлугърал хIаллихшиннарду дуллансса 25 чIавахьулу. Заллаву бур мюрщи оьрчIансса майданну. ЦIана шикку зий дур 8 отдел, 128 инсан. Шикку дуллай бур Виваллил иширттал министерствалийн дагьайсса личIи-личIисса хIаллихшиннарду. Управлениялул къатри ххал дурну махъ, ихтилат бунни Аьбдурашид МахIаммадовлул.
— Управлениялул агьаммур мурад цала масъаларттащал бувкIсса инсантал, аьркинсса кумаг бувну, рязину тIайла буккавур, агьалинан къулайсса шартIру дузал давур. Агана цукунсса-бунугу багьана-сававрттайн бувну, инсантурал мурад щаллу къахъанай бухьурча, миннан бувчIин бан аьркинссар циван къахъанахъиссарив. Гьарицагу зузалал цала кумаг аьркинну увкIсса инсаннаха ххишаласса къулагъас дикIан аьркинссар, — увкунни министрнал.
Ванал барчаллагь увкунни, щавчусса графикрах къабурувгун, цала ххаришиву кIидачIин бувкIсса Ольга Кирилловахь.
Хъирив ихтилат бувсса Ольга Кирилловал управлениялул зузалтрахь увкунни: «Зу щябикIан цинярда шартIру дусса ххаллилсса къатри дурну дур. На дакI дарцIуну бура зугу зулла даву лавайсса даражалий, агьали рязину личIансса куццуй дулланшиврий. Инсаннан аьркинсса чIумал бувсса кумаг хъинну бусрав шайссар. ЛяличIисса къулагъас дикIан аьркинссар цалчин паспорт ласласисса 14 шинавусса жагьилтурах».
Ольга Кирилловал бувсунни сентябрь зуруя шихунмай Аьрасатнал паспорт ласласисса инсантурал шадлугърал даражалий хъа баву («Клятва гражданина РФ») аьдатравун рутантIишиву.
— Инсаннан асар хьун аьркинссар цала статус даххана хьушиву, — увкунни ванил.
