Аьрасатнал хъунама репродуктолог – Дагъусттаннай

Вай гьантрай жулла республикалийн увкIунни Аьрасатнал хъунама репродуктолог, Н. А. Лопаткиннул цIанийсса урологиялул ва интервенцион радиологиялул НИИ-рал директор Олег Аполихин.


П. Рамазанова
Дагъусттаннал Минздраврал бакIчинал къуллугъ чIумуйну бартбигьлагьисса Танка Ибрагьимовлущал ва Республикалул урологиялул центрданул хъунама хIакин Дибир ХIажиевлущал ва ивунни Табасараннал райондалийнгу, микку чиваркIуннал урологиялул азарду ххал дуллалисса медициналул комплекс- аппаратрай хIакинтал цукун зий бурив ххал бунни. Ва ттизаманнул аппаратуралул кумаграйну арамтурал азарду бакIрайра, дахьра сукку шайхтура ялун личин дувайсса дур, хъин буван аьркинми республикалул азарханардайн ва Москавлив тIайла буккайсса бур. Олег Аполихиннул бувсунни цува «Мужское репродуктивное здоровье и социальное долголетие» тIисса программа бартдигьаврил бущи ккаккан республикалийн шинай кIийла-шамийла учIайшиву, проектрал хъунмур мурад бушиву 40-65 шиннардил оьрмулувусса чиваркIуннал цIуллушиву яданшиврулсса профилактика ва дагъусттаннал хIакинтал цува каялувшиву дуллалисса институт­ращал дахIаву дуну зий бушиву. «Билаятрай чиваркIуннал оьрму 11 шинал чIивисса бур хъаннилмурнияр. Зун бюхъай­сса оьрмулувусса арамтал ччяни литIлатIаврин чаран лякъиншиврул, миннал цIуллушиврул ялув цIакьну бацIан багьлай бур. Дагъусттаннай чиваркIуннал репродуктив цIуллушиву ядаврихагу ххуйну зий бур, даву ххуйну кIулсса хIакинтал бур. Гьашину республикалул 4 райондалий зий бу­ссар ялув кIицI ларгсса проект бартдигьавриха. Хъиривмур шинал проект щаллагу республикалул лагрулий бартдигьинтIиссар, сайки циняв районнайсса чиваркI ххал бувантIиссар мобил медкомплексрал кумаграйну. Репродуктив цIуллушиву цIа дан­сса чIумалли демографиялул хIасиллугу ххуйсса», — увкунни Аполихиннул.