Дуккаврил масъалартту ххал бивгьунни

Октябрьданул 23-нний МахIачкъалалив хьунни ПаччахIлугърал Думалул Дуккаврил ва элмулул комитетрал кьатIувсса батIаву. Микку ххал бигьлай бия аьмсса дуккаврил даража ххуй баврил масъалартту. Му мурадрай вай гьантрай Дагъусттаннайн бувкIунни Думалул комитетрал члентал, АьФ-лул субъектирдал паччахIлугърал властьрал законшиврул органнал депутатътал, бартбигьаврил властьрал федерал органнал вакилтал. Мунил сакиншинначитал хъанахъиссар ПаччахIлугърал Думалул профил­сса комитет ва республикалул парламент.


1-мур кьини хьунни планерсса батIаву. Микку ккаккан бунни секцияртталмур бутIуву къулагъас дуван аьркинсса яла агьамми масъалартту.
ДР-лул Халкьуннал Мажлисрал председатель Хизри Шихсаидовлул бувсунни дагъусттанлувтурал буруккин буллалисса цаппара захIматсса масъаларттая. Цалчинмур масъала – ниттил мазурдил бакIрачIан бучIантIимунил къай­гъурдал хIакъиравусса.
— ХIакьину жунма чIалай бур чIявуми оьрчI-бакIуннан цалва ниттил мазру къакIулну бушиву. Мунил сававрду дур укунсса: шяраваллава халкь бивзун най бур шагьрурдайн, ташурду буллай бур цайми миллатирттал инсантуращал, ялапар хъанай бур чIявусса миллатру бусса кIанттурдай.
КIилчинмур масъала – шяраваллаву чансса оьрчIру дуклаки­сса школардай дарсру дихьлахьаву. Тикку биялну бакъар учительтал, дакъар мукунна цил багьайкун дарсру дихьлансса шартIругу. Мукунсса школардай оьрчIаща къахъанай бур лайкьну дуккин. МуницIун бавхIуну жун ччай бур цайми регионнаясса даврил уртакьтурал цалвами школардай­сса тагьардая бувсун. Жу хIакьину пикри буллай буру цаппара шяраваллаву школа-интернатру сакин баврил хIакъираву. Совет заманнай мукун бувну бивкIссар, ми давуртту жул канилух дуркссар. Ягу аьркинни, ххуллурдугу бакьин бувну, оьрчIру буцлан автобусирттай щаллусса школардай дукланшиврул, — увкунни парламентрал спикернал.
ПаччахIлугърал Думалул Дуккаврил ва элмулул комитетрал председатель Вячеслав Никоновлул бусаврийн бувну, хIакьину ххал бигьлай бур хъинну агьамсса масъалартту. Ми ххал бигьаврий гьуртту хъанай бур федерациялул 27 субъектрая бувкIсса вакилтал.
Мунал кIицI бунни цалчин ярглий ххал бигьин аьркинну бушиву аьмсса дуккаву лавайсса даражалийн диян даврил масъалар­тту. Ца цамур агьамсса масъаланугу хъанай бур аьмсса дуккаврил мяъна-мурад (содержание общего образования).
— Жува буру ФГОС-ру цIунил сакин буллалисса жаваблувсса шачIанттуй, миннуйн чул бивщуну хIадур дуллантIиссар дуккаврил программартту, итабакьлантIиссар цIусса луттирду. МуницIун бавхIуну кIул хьун ччива Аьрасатнал Ду­ккаврил ва элмулул министерствалул ци пикри буссарив, увкунни В. Никоновлул.
ОьрчIру чансса школардал хIакъираву мунал бувсмунийн бувну, жула билаятрай чIявусса бусса бур мукунсса школарду, миннувух Дагъусттаннайгу: 42 азарва школалува 26 азарва шяраваллал школарду бур, миннувасса чIявумигу – оьрчIру чансса школарду.
БатIаврий ихтилат бунни Ду­ккаврил ва элмулул бутIуву надзорданул федерал къуллугърал каялувчи Сергей Кравцовлул. Мунал гьартану бувсунни ЕГЭ-рал масъаларттая, ихтилат бунни мукунма учительтал хIадур баврил хIалкьазиялиятугу.
Пленар батIаврий ихтилат бунни Дагъусттаннал дуккаврил ва элмулул министр Шагьаьппас Шагьовлулгу. Мунал бувсунни респуб­ликалий цIанасса ппурттуву ду­ккаврил бутIувусса тагьардания.
Ихтилатру бунни мукунма личIи-личIисса регионная бувкIсса пишакартуралгу.
БатIаврил ахирданий Да­гъусттаннай дуккаврил аралуву хьхьичIунну зузисса пишакартуран дуллунни наградартту. Яла депутатътал лавгунни цалвами секциярдай зун.
ХIадур бувссар
ХI. Аьдиловлул