Агьалинан биял хьунсса ттукI итабакьлантIиссар

[dropcap]Т[/dropcap]тигъанну Лакрал райондалий хьунни 6300 кВт гужрал бу­сса цIусса трансформатор дихьлахьисса хъуннасса шадлугъ. 1986 шиналва бувсса райондалул подстанциялул гуж хъирив къалаллай, махъсса шиннардий агьалинан ттукI биял хъанай ба­къая, хаснува ссутнил ва кIинтнил чIумал, тIабиаьтрал газ бакъасса кIанттай ичIура шартIру къулай дансса чаран так ттукIрайну бакъа ба­къашивугу хIисавравун лавсун.


Зулайхат Тахакьаева
[dropcap]Ш[/dropcap]адлугърай гьуртту хьун бувкIун бия чIявусса бусравсса хъамал: ДР-лул виваллил иширттал министр Аьвдурашид МахIаммадов; транспортрал, энергетикалул ва связьрал министр Сайгидпаша Умаханов; «Дагъусттаннал сетевая компания» ОАО-лул каялувчи Муртазааьли Гитинасулов, Ухссавнил Ккавкказнал МРСК-лул хъунама директорнал маслихIатчи Аьвдулхаликь Халикьов, ДР-лул Жяматийсса Палаталул хъунаманал хъиривчу Ссапар Аьбдуллаев ва цаймигу.
Райондалул бакIчи Юсуп Ма­хIаммадовлул кIицI лавгуна махъсса шиннардий, гьарцаннал ужагъирттай бигьасса шартIру дузал даншиврул, агьалинал ттукI чIявусса харж буллалаврийну, подстанциялул гуж биял хъанай бакъашиврия нигьачIинна диркIшиву, райондалий я тIабиаьтрал газ, я вацIри бакъахьувкун. «Ва тагьарданува буккан жунма кумаг бувунни хIакьинусса шадлугърай жула чIарав бацIан бувкIсса дустурал. Зун цума-цаннангу хъунмасса барчаллагь. Укун хъунмасса гужрай зузисса трансформатор Дагъусттаннай чувчIав бакъасса бур», — увкунни ванал.
ЦIусса трансформатор тIив­тIушиврул лишанну хъана­хъисса ятIул лента кьувкьуна Юсуп МахIаммадовлул, Аьвдурашид МахIаммадовлул, Сайгидпаша Умахановлул ва Муртазааьли Гитинасуловлул.
Сайгидпаша Умахановлул кIицI лавгуна райондалий цIусса трансформатор дишин хьхьичIва-хьхьичI хъунмасса хIарачат бувшиву Юсуп МахIаммадовлул цала, ганал барчаллагь увкуцириннал тIурча, ганацIун кабавкьушиву му мурад чулийн буккан бан. Ванал мукунма бувсуна райондалий гихунмайгу зун тIий бушиву ттукIрал ххаллу цIу давриха. Аьвдурашид МахIаммадовлул кIицI лавгуна зунттаву ялапар хъанахъисса агьалинан биял хьунссаксса ттукIрал щаллушинна дузал даву – му ца яла чара бакъа аьркин­сса буруккин бушиву, мунил кIану бугьан­сса цамур ччуччия зунттал кIанттай дакъашиврийн бувну. Муртазааьли Гитинасуловлул ихтилатрал агьали вихшала дишин бунни цIуну зузи дурсса трансформаторданул гуж хъиривсса 10 шинай биял хьунтIий бушиврийн.
Муния махъ Юсуп МахIамма­довлул Муртазааьли Гитинасуловлун ва Сайгидпаша Умахановлун дуллунни «Лакрал райондалул хIурмат бусса инсан­тал» тIисса цIа ва бавхIунни миннай му цIа дуллушиву тасттикь буллалисса лентарду.
ХьхьичIунну зузисса энергетиктуран дуллунни райондалул администрациялул чулухасса хIурматрал грамотартту ва барчаллагьрал ча­гъарду.
Ахирданий Лакрал райондалул магьирлугърал къатлул зузалт­рал ккаккан дурунни ххаллилсса концерт.