«Анжи» яла лувмур ххуттава ливчунни

Грозный шагьрулий футболданул майданнай данди бувккунни миналул команда «АхIмат» ва МахIачкъалаллал «Анжи»команда.


Ва тIуркIулийну чулийн бувккунни Аьрасатнал футболданул чемпионатрал цалчинмур ятIап.
«АхIмат» командалуща хьхьичIми 3 тIуркIулуву къавхьунни ласун цавагу очко.
«Анжи» команда дия турнирданул сияхIраву яла лувмур ххуттай.
ТIуркIулул дайдихьу хьунни футболистътурал чIявусса гъалатIру итабакьлай. Гъаралунниву захIматну бия футболистътуран цала гьунарду ялун личин бан.
КIилчинмур таймрай «АхIмат» командалул футболист Заур Садаевлул кIанай увксса Мбенгул бивщуну гьан бувсса ттуп жула къапулул ялувмур ттурцIайн щунни. Жула учай:

«Левчумари хьхьичIунгу уккайсса», — куну. ХIарачат буллай дия кIирагу команда цала чулиннай бахтилул бутIа кIункIу бан.
ТIуркIулун ккаккан дурсса чIун къуртал хьуннин «АхIмат» ва «Анжи» командарттал ца-ца гол бакьинсса кьудратгу дуллуна, амма вайннал мурадру щаллу къавхьунни.
ТIуркIулул ялун дуллусса чIумуй цал «АхIмат» командалул штрафной бивщуну гьан бувсса ттуп бакIрах бавкьунни «Анжилул» къапулувун. Ца минутIрава «АхIмат» командалул къапулувунгу муниха лавхьхьусса гол бавкьунни «Анжи» командалул. Ахиргу тIуркIулул дайлитIу хьунни 1:1 счетращал.
«Анжилул» хъиривмур тIуркIу хьунтIиссар Пермь шагьрулий ноябрьданул 5-нний «Амкар» командалущал.

«АхIмат» — «Анжи» 1:1
Голлу: Вилькер (90), Яковлев (90)
«АхIмат»: Гудиев, Сампайо, Вилькер, Семенов, Бериша, Уциев, Исмаэл, Швец, Митришев; (Бацуев, 84), Садаев (Мбенг, 46), Роши (Родригес, 46)

«Анжи»: Лория, Полуехтов, Брызгалов, Самарджич, Яковлев, Хубулов (Гулиев, 63), Афонин, Бакаев, Данченко, Маркелов, Прудников (Долгов, 88).