2018 шинайнсса бюджет ххал бивгьунни

[dropcap]О[/dropcap]ктябрьданул 31-нний ДР-лул Халкьуннал Мажлисрал Председатель Хизри Шихсаэдовлул дунни 2018 шинайнсса республикалул бюджетрал хIакъиравусса закондалул проект хIадур даврин хасъсса батIаву.


[dropcap]Б[/dropcap]атIаврий Хизри Шихсаэдовлул бувсунни Дагъусттаннал БакIчинал кIанайма Владимир Васильевлул тапшур бувну бушиву, республикалул бюджетрал проект хIадур дан му экономикалуха ва социал масъаларттаха зунсса куццуйну. Бюджетрал циняв бутIри бикIан аьркинссар аьчухну чIалачIисса ва коррупция хьун къадитансса.
Яла парламентрал спикернал бувсунни бюджетрал арцу мюнпат бакъа ишла дуллай бивкIшиврул мисаллу. Хизри Шихсаэдовлул кIицI бунни бюджет сакин буллалийни цалчин ярглий хIисавравун ласун аьркиншиву мискинсса агьалинан ва бюджетрал арцуйну ялапар хъанахъиминнан кумаг буллан.
Парламентрал спикернал ДР-лул финансирттал министрнайн тапшур бунни бюджетрал арцу архIалну дачIин муниципал сакиншиннардийх, тиккусса агьалигу хIисавравун лавсун.
Масъала ххал бигьаврий гьуртту хьунни ДР-лул ХIукуматрал Председательнал кIанайманал 1-ма хъиривчу Рамазан Аьлиев, ХIукуматрал Председательнал кIанайманал хъиривчу – ДР-лул экономикалул министрнал кIанайма Раюдин Юсупов, ДР-лул финансирттал министрнал кIанайма Юнус Сяъдуев, ТФОМС-рал директор МахIаммад Сулайманов, ДР-лул Счетная палаталул председатель Билал Жяъпаров ва цаймигу.

ХIадур бувссар ХI. Аьдиловлул