Щалагу Аьрасатнал культуралул ва кIулшиврул «Ночь искусств» акция хьунтIиссар ноябрьданул 4-нний Аьрасатнал 85 региондалий. Аьрасатнал культуралул идарартту щиривкIуну хIадур хъанай бур ва хьхьуну цачIанма бучIан нанисса тамашачитурансса мероприятиярттайн.

Бадрижамал Аьлиева
[dropcap]М[/dropcap]у акциялувух хьхьичIунсса гьурттушинна дувайсса МахIачкъала ва Дарбант шагьрурдугу хIадур хъанай бур тамашачитал хьунабакьин. Ми шагьрурдай хьунтIий дур чичултращалсса, художниктуращалсса, музыкантътуращалсса, актертуращалсса хьунабакьавуртту, бувантIий бур мастер-классру, буккинтIий бур лекцияртту, ккаккан бувантIий бур спектакльлу, концертру, выставкартту. Культуралул шадлугъру му кьини хъунмурчIин дайдишинтIиссар ссят 18.00 хьуну ва лахъи лагантIиссар хьхьудяризаннин.
Ва хьхьуну М. Горькийл цIа­нийсса Оьруснал театрданувун бувкIминнаща бюхъантIиссар ххал дуван выставкартту, актернал пишарайн багьайсса мастер-классру, къундалул анимациялул шоу, Оьруснал театрданул артистътурал ва Опералул ва балетрал оркестрданул концертру. Шиккура «Арбат» ттучандалул духлантIиссар луттирду, литературалул классика ххираминнан­сса бахшишру. Тамашачитураща ялагу бюхъантIиссар гьуртту хьун кIулшивуртту авадан дуллалисса личIи-личIисса программарттавух, ххал буван цавувасса сурат дишаврил гьунар ва ккаккан «Химиялул опытирттал шоу».
А. Тахо-Годил цIанийсса Национал музейрал ва Да­гъусттаннал паччахIлугърал филармониялул хIадур дуллай бур тамашачитурансса «Остров сокровищ» программа. Му хьхьуну филармониялул артистътурал ккаккан дувантIиссар концерт «Джазовые острова» тIисса цIанилусса, хьунтIиссар «Арт Археология» проектрал презентация ва жулла республикалий ва мунил кьатIув цIа дурксса художник Елена Джетерел «АрхАртЗакопки» тIисса цIанилусса арт-класс. Мукунна хьунтIиссар музейравухсса экскурсия, квестрал лишаннугу дусса, ва цила цIанилва циятува бусласисса хьхьувайсса кофе-пауза.
«Дагестанский аул» этнографиялул музейрал заллава ва хьхьуну баллантIиссар Дагъус­ттаннал циняв миллатирттал мазурдийсса балайрду, ми щаллу буллантIиссар ДГУ-рал культуралул факультетрал ва Б. Мурадовал цIанийсса Культуралул ва искусствалул колледжрал студентътурал. Яргсса миллатирттал яннардавусса чIава актертурал миллатирттал мазурдийсса представленияртту кка­ккан дувантIиссар. Минная махъ бюхъантIиссар вичIидишин ДР-лул ПаччахIлугърал халкьуннал инструментирттал оркестрданул рурцусса макьаннах. Хъирив М. Джамаллул цIанийсса Дагъус­ттаннал художествалул училищалул студентътурал ккаккан бувантIиссар мастер-классру.
Поэзиялул театрдануву ва акция дайдишинтIиссар 16.00 ссятраву – Дарбантуллал музыкалул училищалул студентътурал ккаккан бувантIиссар шаэр А. Бестужев-Марлинскийл чивчумунийн бувсса музыкалул ва шеърилугърал композиция. Ссят 18.00 хьуну ва хьхьунил музыкалулмур бутIа байбишинтIиссар Башир Багьауттиновлул (агъач-къумуз) ва Арсен Тлехурайл (гитара).
Р. ХIамзатовлул цIанийсса Национал библиотекалулми нузру тамашачитуран тIиртIуну дикIантIиссар ссят 16.00 хьуну. Шикку ккаккан дувантIиссар «Эстетика. Художественные вечера» проект. ХьунтIиссар Буйнакск шагьрулул итххявхсса оьрчIансса центрданул «Герой нашего времени» проектрал презентация ва «Искусство объединяет» тIисса музыкалул программа ва мастер-классру.
Ва хьхьунусса тамашачитурансса авадансса программартту хIадур дуллай бур Дарбант шагьрулул культуралул идарарттугу. Ссят 17.00 хьуну «Дом Петра I в Дербенте» музейрал комплексрал майданнив зунтIиссар творчествалул дуссукъатта. Художниктурал каялувшиндаралу оьрчIал кка­ккан дуллантIиссар Аьрасатнал ва Дагъусттаннал халкьуннал яннарду, буслантIиссар миннул ляличIишивурттая, хасшиннардия. Ахирданий оьрчIал язими давурттал выставка дувантIиссар.
Дарбантлив «Боевая Слава» музейраву вара чIумал хьунтIиссар акция «Родина моя – Россия» тIисса цIанилусса. Ккаккан дувантIиссар 1917 шинал иширттая бусласисса документал кино.
«Природа Прикаспия» музейраву ссят 17.00 хьуну ккаккан дуллантIиссар «Экология и музей» тIисса цIанилусса программа. ХьунтIиссар Дагъусттаннал ябатIин къашайсса зунттан хас дурсса выставкартту ва лекцияр­тту. Выставкартту дувайсса залдануву хьунтIиссар «Наши горы – наша гордость» тIисса цIанилусса фотовыставка.
Дарбантуллал Дунияллул культурардал ва диннал тарихрал музейраву тIурча, «Искусствалул хьхьу» дайдишин тIий дур ноябрьданул 5-нний ссят 18.00 хьуну. «Сакральный атрибут» тIисса интерактив фотопроектрал презентация хьуну махъ, тамашачитал хьунабакьинтIиссар цIа дурксса режиссер, сценарист ва продюсер, АьФ-лул халкьуннал артист Павел Лунгиннущал. Ва хьхьуну ялагу хьунтIиссар личIи-личIисса мастер-классру.