Мужагьидлул арс Мамедов Жаруллагь
Ноябрьданул 15-нний, оьрмулул 80 шинаву, аьпалухьхьун лавгунни ххаллилсса лаккучу, бурширичу, Мужагьидлул арс Мамедов Жаруллагь.Жаруллагь ия хIакьсса зунтталчу, аслийсса тIуллал заллу. Му ия хъуннасса духIиндарал ва ас-намусрал заллу, гьарцаннал чIарав ацIан чялишсса инсан, магьирсса зузала, махъ нанисса маслихIатчи.
Къизлардал шагьрулул больницалул стоматологиялул отделениялий каялувшиву дуллалийни акъассагу, пенсиялийн увккун махъгу, шагьрулул цачIун хьусса духтуртурал профсоюзрал комитетрай каялувшиву дуллай, гьарцагу агьамсса иширттавух хIалану икIайва, шагьрулул хъуниминначIагу мудан бусравну икIайва. Диялсса бахшиширттангу лайкь хьуссар: «Заслуженный работник здравоохранения», «Отличник здравоохранения» цIардан, «За заслуги перед Отечеством» ва м.ц. Радуевлул къачагътал Къизлардал больницалийн ххявхсса чIумал, Жаруллагь, цала жандалиягу ка ларсун, инсантал ххассал буллай, хIала увххун ивкIссар.
Буршиял жяматран хъуннасса ххаришиву дуссия Къизлардал шагьрулий чул бищунсса, пахру бансса къала бушиврия.
КьурчIишиву кIидачIлай буру Жаруллагьлул кулпатрахь, уссу ХIабимахIаммадлухь, цинявппагу гъан-маччанахь.
Цал гьав нурданул дуцIиннав, махънал оьрмурдай барачат бишиннав.
Буршиял цачIуншиврул ккурандалул чулуха Кьурбан-МахIаммад Кьурбанов
Хъуннасса кьурчIишивугу кIидачIлай, жижара буллай буру Сиражуттиннухь, арсурваврахь, душнихь, куявнахь, цинявппагу гъан-маччанахь, лакрал миллатрал ххаллилсса душ, Хьурттал жяматрал дянивугу хIурмат лавайсса
Мариян ЧIибиевна
жуятува личIи шаврийн бувну.
РухI алжаннул ххари даннав, махъминнал оьрмурдай барачат бишиннав.
Хьурттал жяматрал цIания АьвдуллатIипов АьвдуллатIип
Хъуннасса кьурчIишиву кIидачIлай, жижара буллай буру жулва коллега Маммаева Асиятлухь, ванил ниттихь ПатIиматлухь, уссурваврахь, ссурваврахь, щалвагу агьлу-авладрахь, вайннал ххирасса уссу, арс,
Кьурбан
жагьилсса оьрмулий аьпалувух ишаврийн бувну.
Ва кьурчIишиву духIансса ссавур зухьхьун Заннал дулуннав. Къумашивурттал дайлитIу хьуннав. Махъми дунияллия щалиххан битаннав.
ГьунчIукьатIрал школданучIасса «Дараччи» клубрал коллектив
