[dropcap]Н[/dropcap]оябрьданул 13-нний Дагъусттаннал БакIчинал кIанайма Владимир Васильевлул дунни ДР-лул БакIчинал ва ХIукуматрал Администрациялул ва ДР-лул ХIукуматрал каялувчигу гьурттусса батIаву. Микку ххал бивгьунни республикалул маэшатрал агьамми задачартту дузрайн буккан баврицIун бавхIусса масъалартту.
[dropcap]Р[/dropcap]еспубликалул ХIукуматрал махъсса ппурттуву цаппара давуртту дунни АьФ-лул Президентнал «майрал» хIукмурду биттур баврил, школарду баврил ва 3 сменалий дарсру дишаву духлаган даврил программа биттур даврил лагрулий. Мукунна «Мюхчансса ва ххуйсса ххуллурду», «Къулайшивуртту дусса шагьрулул кIанттурду» тIисса приоритетсса федерал проектру дузрайн дуккан даврин хасну.
Дагъусттаннал ХIукуматрал Председательнал кIанайма Аь. ХIамидовлул бувсъсса куццуй, ми циняв масъаларттан хасну дурну дур ккаккиялунсса давуртту. Масалдаран, гьашинусса шинал ахирданийннин бувну бакIуйн буккан бантIиссар 9 цIусса школа. МахIачкъалалив 6 зуруй бакьин бувну бур 68 кIичIира. 2018-2019 шиннардий бакьин бантIий бур уттигу 98 кIичIира. Ялун нанимур шинал хъуншагьрулул кучарду бакьин буван Дагъусттаннал ласун тIий дур сайки 765 млн. къуруш.
КIицI дунни мукунна кучарду дузал баврил ххуллий хьунадакьлакьисса диялдакъашивуртту ва захIматшивуртту.
Владимир Васильевлул увкунни:
— МахIачкъалалив кучарду бакьин баврин хасну, лавгун, цачIу ххал банну чув бакьин бувну бурив, чув къабувну бурив ва циксса арцу ттигу аьркинну дурив ми бакьин бан, яла пикри банну лирчIми арцу ча лякъин дурив ва цукун къуртал дан дурив лирчIми давуртту.
Ххал бивгьунни ялунчIил лачIун буккаврил Европанал чемпионатрайн хIадур шаврил хIакъиравусса масъалагу.
ДР-лул ХIукуматрал Председательнал кIанайманал хъиривчу, ДР-лул экономикалул министр Раюттин Юсуповлул бувсунни Храх-уба ва Урьян-уба шяраваллал ялапарлувтал Дагъусттаннайн цIусса миналийн бизан баврил тагьардания. Азирбижаннал республикалия Дагъусттаннайн бизан бан аьркинну бур 138 кулпат. Му масъала дузал баву мурадрай федерал ва республикалул бюджетирттал проектирдай ккаккан дурну дур 2018 шинайн 210 млн. къуруш (миннувату 200 млн. федерал бюджетравату).
МахIачкъалаллал бакIчи Муса Мусаевлул бувсунни хъуншагьрулул администрациялул контрольданийсса масъаларттаяту.
ХIадур бувссар
ХI. Аьдиловлул
