Владимир Васильевлул барча бунни Дагъусттаннал учительтал

Дагъусттаннал БакI­чинал кIанайма Владимир Васильевлул барча увкунни республикалул ду­ккаврил зузалтрахь Учительнал кьини.


«Барча зул пишакарнал байран – Учительнал кьини!
ХIакьину педагогтурал хьхьичI бавцIуну бур къабигьасса масъалартту: укунна кIулшивуртту дулаврияр ххишала, аьркинссар оьрчIан лахьхьин буван пикри буллан, гьарзат хIисавравун ласлан, цалла дурмунил жаваблувшиву бакIрайн ласлан, миннан кумаг буван жула билаятрал лайкьсса инсантал хьун.
Учительнал пишакарнал устталугъ, аькьилшиву ва ссавур, чялишсса гражданшиврул чул бугьаву, цалва тарбия буллалиминнахсса къулагъас буниялагу багьа бищун къашайсса ххазинардур.
На зун чIа тIий ура каялувчинан зу бувчIаву, даврил уртакьтурал зул хIурмат баву ва зуцIун оьрчIал нитти-буттал кабакьаву. ЦIакьсса цIуллушиву, барачат, хъиншивуртту ликканнав зуйнгу, зун ххираминнайнгу!» – тIий бур барча баврий.