«Жу ххув хьун аьркинссияв»

[dropcap]С[/dropcap]ентябрьданул 23-нний Москавлив хьунни ирглийсса Аьрасатнал футболданул чемпионатрал Москавуллал «Спартак» ва МахIачкъалаллал «Анжи» командарттал дянивсса тIуркIу.

Руслан Къардашов
[dropcap]Ц[/dropcap]алчин, «Спартак» командалуща, Аьрасатнал футболданул чемпионнаща, хьхьичIмур турданий ххув хьун къархьунни «Тосно» командалуяр. ТIуркIулул ахир дучIаннин рязину буклакисса «Спартакрал», кIива голгу къапулувун кьамул бувну, кIунттища итххяххан диртунни ххувшаву. КIилчин, «Анжи» команда хьхьичIмур тIуркIулий 1:5 счетрай дух хьуссия «Краснодар» командалуяр.
КIирагу командалун аьркинну бия ххувшаву ласун.
ТIуркIулул дайдихьулийра командарттал ккаккан дурунни кьянкьа-кьурчIисса хасиятру. Цакуцну нанисса тIуркIу лиян бувунни арбитр Виталий Мешковлул, щакирайсса пенальти «Анжилул» къапулувун ккаккан бувну. «Спартакрал» гьужумчи Луис Андрианол бавкьунни цалчинмур гол. 70-мур минутIрайн бияннин жула къапучи Будаковлул кIийла-шамийла голдания бурувччунни «Анжилул» къапу. ТIуркIулул 74-мур минутIрай «Анжилул» чулуха сукку хьунни мугьали.
Цалчин, жула футболист Самарджичлул цахьхьунма биривсса ттуп бакIрах бивщуну гьан бувунни «Спартакрал» къапулувун.
КIилчин, 4 минутIрава «Анжилухлу» цала цалчинмур гол бавкьунни гьужумчи Кацаевлул. ТIуркIулул ялун ххи дурсса 2-мур минутIрай «Спартак» команда дух шаврища ххассал дунни Мельгарехол бавкьусса голданул. Ахиргу тIуркIулул дайлитIу хьунни 2:2 счетрайсса.
Пресс-конференциялий «Ан­жи» командалул хъунама тренер тIий ия: «ХIакьину, ттул пикрилий, жу ххувшаврин лайкьссияв».
ТIайлар, гьашину «Анжи» командалул ва цалчинмур тIуркIур, футболистътал хъачIрай хъачI дирхьуну, цаннахлу ца увккун, шаймуних ва къашаймуних къабурувгун, майданнив талай бивкIсса.
«Спартак» — «Анжи» — 2:2.
Голлу бавкьунни: Андриано, 14 (1:0);
Самарджич, 74 (1:1); Кацаев, 78 (1:2), Мальгарехо, 90+2 (2:2).
«Спартак»: Ребров, Ещенко, Таски, Боккети, Комбаров (Джикия, 67), Пашалич (Мальгарехо, 77), Попов, Самедов, З. Бакаев, Ананидзе (Фернандо, 35), Андриано.
«Анжи»: Будаков, Тетрашвили, Полуяхтов, Кацаев (Брызгалов, 85), Рибел, Прудников (Хубулов, 72), Самарджич, М. Бакаев, Маркелов, Яковлев, Данченко (Афонин, 90+1).

«Анжилул» хъиривмур тIуркIу хьунтIиссар Каспийскалий октябрьданул 1-нний Санкт-Петербургуллал «Зенит» командалущал.