ЖучIа вил хIурмат мудангу буссар

Школалий дуклакисса шинну гьарица инсаннал оьрмулуву яла ххарими, яла дакIний личIанми духьунссар. Школа къуртал бувну 30-хъайсса шинну ларгнугу, мудан цачIун бавтIтари жу тай чIунну дакIнийн дичлан бикIару.

Жул классраву бия 20-хъайсса оьрчIру. Бакъахьунссар цIана цавагу шяраваллил школалий миксса оьрчIру бусса класс. Жу чIявуми бияв учительтурал оьрчIру, дарсру лахьлахьисса, школалий дуллалисса циняв мероприятиярттаву – олимпиадарттай, художествалул самодеятельностьраву, спортрал бяст-ччаллаву чялишну гьуртту хъанахъисса. Школа къуртал баннин жул класс хьхьичIунсса класс­ран ккаллину бикIайва. Байбихьулул 3 классгу къуртал бувну, 4-вун бувксса чIумал, жухь оьрус мазрал ва литературалул дарсру дихьлан увкIуна дахьа институт къуртал бувсса жагьилсса учитель Магьдиев Даниял МахIаммадаьлиевич. Му ивтуна жул классрал каялувчинугу.
Зун гьавас бусса жагьил­сса учитель бакIрайн агьавриву жунгу бахтти хьуна, дарсирдах гъира бусса оьрчIру бакIрайн багьавриву – ванангу. Даниял МахIаммадаьлиевичлул сипталий ва каялувшиндаралу, цинявппа дуклаки оьрчIру хIала бувххун, був­ссия литературалул кабинет. Миву дурссия цимирагу литературалул вечер, шеърирду пасихIну буккаврил конкурсру, школалул сахIналий ккаккан бувссия А. Пушкиннул «Евгений Онегин», А. Грибоедовлул «Горе от ума», Н. Островскийл «Как закалялась сталь», А. Фадеевлул «Молодая гвардия», произведениярттавасса парчри.
Оьрус мазрал, литературалул дарсру дайдирхьусса кIул хьуннин ца лахIзалий лагайва. Къашайва жул дарсирдай цавагу бизарсса мутта. Даниял МахIаммадаьлиевичлул кIул бувнав жу оьруснал ва дунияллул классикалущал, бувтуна оьрус мазрахсса гъира. Жун тай дарсру тачIав хъамакъаритай.
ХIурмат бусса Даниял Ма­хIаммадаьлиевич! Барча тIий буру вихь Учительнал кьини. Ва ина кунмасса буниялагусса учительтурал байранни. ЦIуллушиву дулуннав вихьхьун, дакIниймур бартлаганнав, дуллалимуницIун Заннал ка бакьиннав.
Вил хIурмат бусса 4 «б»
классрал дуклаки оьрчIал цIания
Андриана Аьбдуллаева