ЧIунни фонограммарттая махъунмай хьун

Октябрьданул 13-нний ДР-лул культуралул министрнал буржру чIумуйну биттур буллалисса Зарема Буттаева хьунабавкьунни жулла республикалул балайчитуращал, Дагъусттаннал паччахIлугърал Татам Мурадовлул цIанийсса филармониялул солистътуращал. Ва ххуллухмур ихтилат бия, хъунмурчIин, фонограммартту ишла къадурну балайрду учаврия, цIу-цIусса балайрду, проектру дуккан даврия, музыкалул программарттал даража лавай баврия.

Бадрижамал Аьлиева
— Цимирагу шинал мутталий эстрадалий махъа-хьхьичIуннай кIура даен дуллай бур Дагъусттаннал балайрдал фольклорданул аслийсса хасиятру, лишанну, дакъа хъанай дур аслийсса музыкалул материалданул хIакьшиву. Щаллу буллалисса балайрду бур цава-цасса, ца журалийсса. Уттизаманнул балайчитурал репертуардава дакъа хъанай дур акапель журалул щаллу баву. ЧIявусса чIурду бусса ансамбльданул тIутIисса балайрдая гъалгъавагу къатIра. Жу луглантIиссару лавайсса даражалул фонограммартту щаллу дан­сса чараннах. Амма тамашачитуран цукссагу хьхьичIри ва хIазри балайчинал цала чIунийну, инструментирттал ансамбльданухун, халкьунналми бикIу, эстрадалулми бикIу личIишиву дакъа, щаллу бувсса балайрду, — увкунни Замера Ажуевнал.
Дирижер Новруз Шагьбазовлулмур буруккин бавхIуну бия балайчитуран хъамавабитавай бушивруцIун оркестрдащал, сагъсса чIунищал зун, муданнара фонограммартту ишла дуллалисса артистътурал пишакаршиврул даража цалнияр цал ялавай багьну най бушивруцIун.
Балайчи ТIагьир Курачевлулмур ихтилат бия балайчитурал репертуардаву Дагъусттаннал халкьуннал музыкалул культуралул язими аьдатру чIалачIи дуллали­сса миллатирттал балайрду сайки бакъашивриясса, миннун кIанай артистътал «хъатIал репертуар­ттащал» сахIнардайн буклай бушивриясса.
Композитор Рамазан Фаталиев увккунни художествалул совет­рал журалийсса, культуралул иш­ккаккултрая, композитортурая, чичултрая сакин бувсса цIусса орган тIитIаврил сипталущал.
Мукунма ва кьини ихтилатру бувминнал бавтIминнал хьхьичIун лавсунни, халкьуннал ва эстрадалул балайрдал журарду машгьур ва хьхьичIунмай баву мурадрай, цIусса ансамбльлу сакин баврил сиптагу, мукунма мува мурадрай щаллу буван дакIнийсса цайми-цайми пикрирдугу.