Ниттил мазурдил дарсру чан дуван?!

Дагъусттаннал Жяматийсса палаталул заседаниялий палаталул член МахIарам Аьлиджановлул маслихIат бунни ни­ттил мазурдил дарсру чан дуван, Дагъусттаннал тарих, культура, аьдатру лахьхьин дуллалисса «дагестановедение» тIисса дарс ду­ккан дуван.

«Республикалул школарттай нюжмардий ниттил мазурдил 3 дарс чIяруссар, на школалий дуклакисса 1950-1960 шиннардий ниттил мазрал дарс нюжмардий цал дишайссия, цурдагу 8-мур классравун бияннин. Ни­ттил мазрал дарсру чанну душиву жухун къадахчайва Совет Союзрал яла хьхьичIунми вузирдавун дуклан буххан», — тIий ур чиновник. Ва ур оьрчIругу ниттил мазурдил дарсирдайн занай ба­къар, ттуршра шинал лажиндарай Да­гъусттаннай ацIунниха ливчусса мазру бухлавгссар, бухлавгун нанисса мазру гужрай къабухлаган битан къашай­ссар, тIий. «Ттул никирал агьулданун Да­гъусттаннал культура ва аьдатру ла­хьхьин къадувайва школарттай, лахьхьин къадунничала куну, ттущал чIунархIалми культура дакъа­сса ягу аьдатру къакIулсса бакъархха. Тарихрал ва культуралул дарсру цачIун дурну, «дагестановедение» тIисса предмет дихьларча хъинну хьунссия», — тIий ур Аьлиджанов. Дагъусттаннал интеллигенция, жяматий­сса ккуранну ниттил мазрал дарсру чан даврийн къарши буклай бур. Цуксса тамаша бизарчагу, бур республикалий, къатиха-шиха бувкIссача, шиккувасса агьлу, ниттил мазурдил муттаэтал. Бур ниттил мазрал дарсру щихунни дахчилачисса, авадансса тарих, культура дусса Дагъусттаннай тарихрал, культуралул дарсру чан дувансса маслихIат ахIмакьшивур тIутIисса цIакьсса чIарахбацIултгу.
Жу умудрай буру ва агьамсса иширал хIакъираву «Илчилул» буккултрал цалвами пикрирдугу бусанссар тIий.

ПатIимат Рамазанова