[dropcap]М[/dropcap]ахIачкъалалив Да­гъусттаннал педагогикалул университетрал физикалул ва информатикалул факультетрай октябрьданул 21-нний 8-11-ми классирттал дянив хьунтIиссар 5-сса респуб­ликалул «Пифагор» тIисса математикалул олимпиада.

Укунссара олимпиада шикку хьуссар октябрьданул 14-нний 5-7-ми классирттал дянивгу. Ванил сакиншинна дурну дур Дагъусттаннал КIулшивуртту дулаврил ва элмулул министерствалул, ДГПУ-рал, «Пери» ихIсандалул фонд­рал ва «Надежда» ДО ЧОУ-рал.
Ванивух гьуртту хьуну бур ца райондалиясса школарттал цал архIалсса классир­ттавасса 4-5 дуклаки оьрчIру. ХIасил, ца-ца райондалия­сса 35-ннийн бивсса оьрчIаща гьуртту хьун бювхъуну бур. Шагьрурдал школарттаясса цал архIалсса классирттава гьуртту хьуну бур кIи-кIия дуклаки оьрчI, шагьрулул ца школалиясса 14 дуклаки оьрчIахь диркIссар олимпиадалий гьуртту хьун­сса ихтияр.
Олимпиадалул заданияртту дан 5-7-ми классир­ттал дуклаки оьрчIан кка­ккан дурну дур 3 ссят, 8-11-ми классирттал дуклаки оьрчIан тIурча – 4 ссят. ХьхьичIунсса кIанттурдан ва бахшишир­ттан лайкь хьусса оьрчIал сияхI лякъин бюхъантIиссар ДГПУ-рал физикалул ва математикалул факультетрал сайтрай.

Гьашинусса олимпиадарттал цалчинмур шачIану

[dropcap]Г[/dropcap]ьашинусса дуккаврил шинал щала билаятрал олимпиадалул цалчинсса этап хьу­ссар Къизлардай.
Ттинин шагьрулул школарттал 1400-ксса дуклаки оьрчI гьурттусса экологиялул, обществознаниялул, ингилис мазрал, литературалул, оьрус мазрал, ОБЖ-лул, физикалул, биологиялул, географиялул, правалул, немец мазрал ва физкультуралул 13 олимпиада хьуну дур. Вания гихуннайгу дан лирчIун дур 6 дарсирал олимпиада. ЦIана нанисса олимпиадарттал цалчинмур этап къуртал хьунтIиссар октябрьданул 23-нний. Мунил хIасиллал чIалачIи бантIиссар дуклаки оьрчIал кIулшивурттал даража.

ХIадур бувссар
З. АьбдурахIмановал