«Жущава шайссар»

Уттигъанну Санкт-Петер­бурглив хьуссар цIуллу-сагъшиврул ссуссукьусса оьрчIал дунияллул халкьуннал дянивсса Павел Султаннул цIанийсса «Мы можем» цIанилусса фестиваль.


Бадрижамал Аьлиева
[dropcap]М[/dropcap]у дурну дур Дмитрий Борисовлул «Добрые люди» тIисса цIанилусса ихIсандалул къатлул, Санкт-Петербургуллал шагьрулул Культуралул комитетрал ва законодателсса мажлисрал чIарав бацIаврийну.
Фестивальданувух гьуртту хьуну бур Аьрасатнал личIи-личIисса регионнаясса ва чил билаятирттаясса 25 оьрчI. Да­гъусттанная му фестивальданий гьуртту хьуссар Гъуниннал райондалийсса ЧIухърал шярава­сса, Избербаш шагьрулий яруннин чани бакъасса оьрчIансса школа-интернатрай дуклаки­сса, 13 шинавусса Шамил Аьбдуллаев. Мунащал жула билаятрал Ухссавнил хъуншагьрулийн лавгун бур педагог Евгения Исяева. Шамиллул увкуну бур буттал кIанттухасса яру мазрайсса балай. Мунащал архIал сахIналийн бувккун бур «Имамат» цIанилусса ансамбльданул къавтIалт.
Залданувугу къачансса да­гъусттанлувтал бивкIун бур, миннавух Дагъусттан Республикалул Муданмасса вакилханалул зузалт, Дагъусттаннал жагьилтурал сакиншинналул вакилтал председатель Асель Рашидова бакIчину, авиациялул отставкалийсса полковник Арсен ХIусайнов, мукунма цаймигу. Фестивальданий махъ лахълай, Дагъусттаннал вакилханалул зузала МахIаммад Оьмаракаевлул кIицI лавгун бур гьунар бусса оьрчIал чIарав бацIавриву, инсантурал дянивсса дусшиврул арарду цIакь давриву, махъа нанисса никираву хъиншиврул гьану бизавриву уку-укунсса фестиваллал бугьлагьисса агьам­сса кIану, барчаллагьрал чагъар буллуну бур Дмитрий Борисовлухьхьун.
Фестиваль наниссаксса хIаллай цIуллу-сагъшиврул ссуссукьусса оьрчIащал архIал сахIналийн бувккун бур эстрадалул балайчитал, музыкантътал, киноактертал.
Жулла республикалиясса чIава балайчинан Д. Борисовлул, муная цIагу дурну, дуллуну дур лауретнал грамотагу, дакIний личIансса бахшишгу.
Фестивальдания махъ Шамил Аьбдуллаев хьунаавкьуну ур Санкт-Петербурграй ялапар хъанахъисса дагъусттанлувтуращал, миннал тавакъюрайн бувну, увкуну бур цаппарасса балайрдугу.