ЧIаратусса ХIажинал арс Мирзоев МахIаммад
дунияллия лавгсса бавукун, нава ачIи ивкIусса куна хьура, дуниял лухIи-цIан ларгунни.

МахIаммадлул дакI хъинну тархъансса дия, кару мусилсса дия, дуниял чанна шайва. Дурккусса акъанугу, ия интеллигент, кIула 8-9 маз, миннувух – чачан ва узбакI мазгу.
МахIаммадлул, ххуйсса тарбиягу дуллуну, хъуни бунни 4 арс ва 2 душ.
Ттула дус, чIаххучу дунияллия лавгун, навагу ятин хьунна.
Цал гьав нурданул дуцIиннав, алжаннул ххари аннав.
Махънал оьрмурдай барачат бишиннав, Амин.
Нагу Жаруллагь Керимов,
ш. ГьунчIукьатIи

---

ХIаидлул арс Хучуев Мажид

Оьрмулул 59 шинаву, лавмарт­сса къюкIлил азарданул ххассал къаивтун, июнь зурул 27-нний дунияллия лавгунни Хъусращиял шяраву, сийлийсса тухумрал лайкьсса чув Хучуев Мажид ХIаидлул арс.

Мажидлул къуртал бувссия Дагъусттаннал шяраваллил хозяйствалул институтрал ветеринар факультет. Щала кутIасса оьрмугу хас бувссия язи дургьусса сянатран, личIи-личIисса къуллу­гъирттай зий уссия Ваччав ветстанциялий, Бабаюртлий ветучасток­рай ва м.ц.
1989 шиная шихунмайсса Мажидлул оьрму бавхIуну бия Хъусращиял Буниямин Аминовлул цIанийсса колхозрал ризкьилуцIун. Махъсса шиннардий Мажид зий уссия Хъусращиял СПК-лул лухIи ризкьилул отраслилул хъунаману.
2010 шинал ноябрь зуруй Мажид лайкь хьуссар «Дагъусттаннал шяраваллил хозяйствалул лайкь хьусса зузала» тIисса хIурматрал цIанин ва лишандалун, 2011 шинал – «ЗахIматрал ветеран» тIисса хIурматрал цIанин.
Алжан буливу, Мажид уссия дакI-аьмал хъинсса, инсантуращал нахIу-хIалимсса, ас-намусрал бутIа Аллагьнал ххину буллусса хIакьсса зунттал чув. Ванал хIурматгу, кьадру-кьиматгу лавайсса буссия шяраваллил жяматравугу, щалла райондалийгу, зузалтрал ва уртакьтурал дянивгу.
Алжан нясив баннав, рухI хъинний дишиннав, ванан къабуллумур оьрму оьрчIан-душваран Заннал ххи бувну лякъиннав.
Хъусращиял жямат,
дустал, гьалмахтал