Жандалий хIайп къакуну

[dropcap]О[/dropcap]ктябрь зурул 1-нний Дагъусттаннал БакIчи Рамазан Аьб­дуллатIипов Тыва республикалиясса делегациялущал июнни Хасавюртуллал райондалийсса Къарланюрт шяравун.


А. Аьбдуллаева
Аьрххилул мурад бия Къарланюртлив ялапар хъанахъисса Салахбековхъал кулпатращал хьунабакьаву. ДакIнийн бутан, 26 шинаву­сса Рашид Салахбеков оьрмулуцIа хьуссия, Москва неххавун бюкьлакьисса душ ххассал буллай.
— На хьунаавкьура Тыва респуб­ликалул БакIчинащал. Дагъус­ттаннал жагьилнал дурсса чувшиврун лавайсса кьимат бивщунни танал. БувчIлай бур, арснацIа хьу­сса нину-ппу цукун хIасратрай бу­ссарив, бувчIлай бур арснал кIану щилчIав къабугьантIишивугу. Ванал чувшиврия жунма цинявннан кIулну бикIан аьркинссар, пахру бикIан аьркинссар, — увкунни Рамазан АьбдуллатIиповлул. «Аьра­сатнал халкьуннал ассамблея» тIисса ООО-лул председательнал хъиривчуну ивкIсса Ондоро Чимит-Доржул увкунни: «Ва буниялагу хъуннасса къучагъшивур. Рашид Салахбековлул цала жандалий хIайп къаувкуну ххассал був­ссар бюкьлакьисса душ. Ванал кка­ккан бунни цува хIакьсса дагъус­ттанчу ушиву. Тувиннал халкьуннал бусрав-барчаллагьрай дакIнийн дутавантIиссар ванал цIа».
ПаччахIлугърал Думалул депутат Мергеп Ооржаклул бувсунни цивппа Дагъусттаннайн Рашид Салахбековлул нитти-буттахь барчаллагь учин, ва лявхъусса аьрщарайн икрам бан бувкIшиву. Региондалул каялувчи Шолбан Кара-оолал цIания ванал дуллунни Рашидлул нитти-буттахьхьун Тыва республикалул орден. Цала чулуха жижарагу бувну, ххаллилсса арс тарбия увсса нитти-буттан барчаллагь баян бунни Тыва республикалул Верховный Хураллал депутат Радислав Новажаплул. Рамазан АьбдуллатIиповлулгу дуллунни виричунал буттахьхьун «Жагьилтал ватан ххирану тарбия буллай бивхьусса захIматрахлу» тIисса АхIмад-хан Султаннул цIанийсса медаль.