[dropcap]Т[/dropcap]талаткьини Лакрал райондалул администрациялул актовый залдануву хьунни Дагъусттаннал халкьуннал шаэр, драматург, таржумачи Сибирбаг Кьасумовлущалсса хьунабакьаву. Му хас дурну дия шаэрнал оьрмулул 70 шинал юбилейран.

[dropcap]Х[/dropcap]ьунабакьаврий гьуртту хьунни райондалул администрациялул бакIчи Юсуп МахIаммадов, Да­гъусттаннал Чичултрал союзрал хъунама МахIаммад АхIмадов, администрациялул ва идарарттал зузалт, Гъумучиял школалул дуклаки оьрчIру.
Шаэр барча уллалисса их­тилат­ру бувна Юсуп МахIамма­довлул, МахIаммад АхIмадовлул, райондалул кIушиву дулаврил управлениялул каялувчи Явсупи ХIамзаевлул, Аьрасатнал лайкь хьусса учитель Даниял Магьдиевлул. Ихтилатру буллалиминнал кIицI лавгуна шаэрнал наз­мурду рирщушиву школалул хрестоматиярттай, антологияр­ттай, ванал балайрду тIий бушиву лакрал балайчитал. Гъумучиял школалул дуклаки оьрчIал дурккуна шаэрнал назмурду. Сибирбаг Кьасумовлул, хьунабакьаврийн бувкIминнахь барчаллагьгу куну, цала шеърирду бувккуна. Ахирданий магьирлугърал къатлул зузалтрал кка­ккан дурна концерт.

Жул корр.