Лак цIусса миналийн бизан баврил цIусса программа цIакь дунни

Дагъусттаннал ХIукуматрал ХIукмулийну цIакь дунни ДР-лул ПаччахIлугърал программа «ЦIуссалакрал райондалул лак­рал агьлу цIусса миналийн бизан баву ва Аухуллал район цIу дуккан даву 2018-2025 шиннардий».


[dropcap]М[/dropcap]у документрайн бувну, лак цIусса миналийн бизан бувантIий бур, аьркинсса инфраструктурагу дузал дурну, мукунма бизан буллалисса аьрщаран «ЦIуссалакрал район» тIисса муниципал райондалул цIагу дирзун, лак бизан бувсса аьрщаран «Аухуллал район» тIисса цIагу дирзун.
Программалийн бувну цIусса миналийн бизан бан аьркинссар, аьмну лавсун, 664 кулпат, 2656 инсан, уттигу бан 664 къатта, 7 ясли-сад 830 оьрчIансса, цIуллушиву дуруччаврил идарартту, миннувух 1 оьрчI байсса отделение, 8 ФАП, 8 культуралул идара, 4 администрациялул идара.
ЦIуну дуллалисса 9 шяраваллин аьркинни 95,6 километра электросетирдал, 80 километра газрал турбардал, 39,5 километра щинаххуллурдал, шяраваллавунсса ххуллурду 135,8 километралул манзилданий, ламурду Шура-Озень не­ххайх; дуккан щинал щаллу бансса къувирду; 130 километра канализациярттал, щин марцI дайсса сооружениярттащал.
2018-2025 шиннардий харж дан аьркинни ми давурттан 12 млрд. ва 376 млн. къуруш. Миннувату 9 млрд. 376 млн. къурушру – федерал бюджетрал арцур; 1 млрд. ва 386 млн. къуруш – республикалул бюджет­ралссар, ва лирчIми 1 млрд. ва 614 млн. къуруш лякъин аьркинссар бюджетрал дакъами кIанттурдая.
ХIадур бувссар
ХI. Аьдиловлул