[dropcap]С[/dropcap]ентябрь зурул 27-нний «Молодежь Дагестана» кказитрал редакциялий хьунни Дагъусттаннал терроризмалул идеологиялийн къарши бацIаврил масъалартту ххал бигьлагьисса батIаву. Шикку гьуртту хьунни республикалул СМИ-дал каялувчитал ва журналистал.
А. Аьбдуллаева
Дагъусттаннал печатьрал ва информациялул министр Рашид Акавовлул ва мунал хъиривчу Сергей Снегиревлул журналистурал хьхьичIун ларсунни терроризмалул идеологиялийн къарши бацIаву мурадрай личIи-личIисса министерстварттал дан ккаккан дурсса давурттал план ва миккун итадакьинтIисса арцул ккал ккаккан дурсса программа. Программа, иширайну щаллу дуллай байбишиннин, республикалул СМИ-дал вакилтурал хьхьичIун ларсунни, миннал цала чулухасса маслихIатру ва дахханашивуртту даву мурадрай.
Журналистурал бувсунни мунил хIакъиравусса цалами пикрирду.
«Дагъусттан» ГТРК-лул хъунмур Луиза Аьлихановал маслихIат бунни кIирисса точкардай зузисса журналистуран кабакьу буллан.
Мукунма журналистурал маслихIат бунни терроризмалийн къарши бацIансса куц лахьхьин буллалисса семинарду бан ва ми семинарду бачин бансса пишакартал хIадур баврих къулагъас дан, цинярда терроризмалийн къаршисса материаллу ххал дан бюхъайсса АФ (антитеррористический фонд) сакин дан.
