[dropcap]О[/dropcap]ктябрь зурул 20-нний МахIачкъалалив, Дусшиврул къатлуву, хьунни Дагъусттаннал паччахIлугърал медициналул университет­рал юбилейран хас бувсса мажлис.

А. Аьбдуллаева
Дагъусттаннал медуниверситетрал зузалт ва студентътал 85 шинал юбилейращал барча бан бувкIун бия ДР-лул ХIукуматрал председательнал цалчинма хъиривчунан кIанайсса Анатолий Карибов, Аьрасатнал ЦIуллу-сагъшиву дуруччаврил министерствалул медициналул кIулшивуртту дулаврил ва кадрардал политикалул департаментрал директор Татьяна Семенова, ДР-лул ХIукуматрал, Халкьуннал Мажлисрал, МахIачкъалаллал администрациялул вакилтал, Ух­ссавнил Ккавкказуллал, федерал округрайсса ВУЗ-ирдал ректортал, жяматрал ва политикалул ишкка­ккулт.
Ихтилатру байбишин хьхьичI ккаккан дунни Дагъусттаннал медициналул университетрал тарихрая бусласисса кино.
Хъирив ихтилат бунни ДГМУ-лул ректор Сулайман Маммаевлул.
— ХIакьину Дагъусттаннал медуниверситетрал кIицI дуллалиссар 85 шин хъанахъисса юбилей. Лахъи­сса ва бусравсса ххуллу бивтун бур жула университетрал. Мунил жула хIурматгу гьаз буллалиссар, жуярасса тIалавшиннагу ххишала дуллалиссар. Университетрал преподавательтурал хъунмасса захIмат бихьлахьиссар жула студентътуран куртIсса кIулшивуртту дулун, миннал оьрму тIааьнсса, яргсса, мюнпатсса иширттайну авадан бан.
Махъсса шиннардий ВУЗ-рал ФГОС-рал тIалавшиннардах бурувгун даххана дунни кIулшивуртту дулаврил стандартру, цIуну тIивтIусса элмулул ва кIулшивуртту дулаврил инновациялул центрданийсса симуляциялул технологияртту ишла даврийну цIу дуккан дунни практикалийну кIулшивуртту дулаврил система.
Шикку студентътураща ва вы­пускниктураща бюхълай бур куртIсса кIулшивуртту ласун, аккредитация дурну махъ зун байбивхьуну, цалчинсса медициналул ва санитариялул кумаг буллан.
Ишла дуллан бивкIру цIусса технологияртту. Жу хIарачат буллай буру дунияллул кIулшивуртту дулаврил системалувун багьан, 20-нния лирчусса икьраллу чичарду хьхьичIунсса Аьрасатнал ва дунияллул халкьуннал дянив­сса вузирдащал. ХIакьину университет ХХI-мур ттуршукулул вузирдал тIалавшиннардил даражалий бур. Ттула чулухагу, щалагу коллективрал чулухагу барчаллагь учин ччай ура Республикалул БакIчинахь, Парламентрахь ва ХIукуматрахь, ляличIинува АьФ-лул цIуллу-сагъшиву дуруччаврил министр Вероника Скворцовахь, мудангу жура дуллалисса давур­ттал чIарав бацIлай тIий. Барчаллагь тIий ура Татьяна Семеновахь, даврил щавчусса графикрах къабурувгун, жучIанма бучIан чIун ляркъусса, ПаччахIлугърал Думалухь, цинявппагу ттула коллегахъахь – СКФО-лул ва Дагъусттаннал вузирдал ректортурахь, министерствар­ттал ва ведомстварттал каялувчитурахь, жулла юбилей лахъа-хъун дан бувкIсса, – увкунни Сулайман Маммаевлул.
Республикалул БакIчинал ва ХIукуматрал цIания Дагъусттаннал медициналул университет барча бунни Анатолий Карибовлул.
— 85 шинал лажиндарай Да­гъусттаннал медициналул университетрал чIярусса хьхьи­чIуннайшивурттащалсса ххаллил­сса ххуллу бивтун бур. Республикалул агьалинал цIуллу-сагъшиву дуруччавриву, лавайсса даражалул хIакинтал хIадур бавриву вайннал бивхьусса захIматран багьа бищун къашайссар.
ДГМУ хъанахъиссар авадан­сса база ва ххаллилсса пишакартал бусса республикалул ца яла хъунмамур элмулул ва ахттаршиндарал центрну. Шиккусса аьлимтурал ва студентътурал ахттаршиннарду дунияллул халкьуннан бусрав хьусса дур.
ЛяличIину анаварсса бущилий хьхьичIунмай най бур ВУЗ махъсса шиннардий. Цала пиша ххира­сса, лавайсса даражалул пишакартал хIадур бан хъунмасса захIмат бихьлай бур университетраву дарсру дихьлахьисса хIакинтал, — увкунни Карибовлул.
Аьрасатнал цIуллу-сагъшиву дуруччаврил министр Вероника Скворцовал чулухасса барча баву дурккунни Татьяна Семеновал.
— Дагъусттаннал медициналул университет хъанай бур Ухссавнил Ккавкказуллал хьхьичIунсса элмулул, цIуллу-сагъшиву дуру­ччаврил ва кIулшивуртту дулаврил центр. Мунил бугьлай бур лайкьсса кIану Аьрасатнал медициналул ВУЗ-ирдал дянив. Авадан­сса потенциал бусса университетрал уттиния тихуннайгу цикссагу хьхьичIуннайшивуртту даншиврий щак бакъар, — тIий бур барча буллалисса адресраву.
Циламур ихтилатраву Татьяна Семеновал кIицI лавгунни республикалул цIуллу-сагъшиву дуруччаврил аралувусса хьхьичIуннайшивуртту циняв ВУЗ-рал коллективрацIун дархIусса душиву.
— Укун авадансса тарих, ххаллилсса школартту ва цала даву ххирасса инсантал бусса ВУЗ бушиву республикалун хъунмасса тIайлабацIу хьушиврун ккалли бан бучIиссар, — увкунни ванил.
Дагъусттаннал медициналул университет юбилейращал барча буллалисса ихтилат бунни мукунма АьФ-лул ПаччахIлугърал Думалул депутат Аьвдулмажид МахIрамовлул, ДР-лул Халкьуннал Мажлисрал председательнал хъиривчу МахIмуд МахIмудовлул, МахIачкъала шагьрулул мэрнал хъиривчу Запир Алхасовлул, ДР-лул цIуллу-сагъшиву дуруччаврил министр Танка Ибрагьимовлул ва мукунма цайминнал. Цинявппагу ихтилатру буллалиминнал кIицI лавгунни, хьхьичIрами аьдатругу дуручлай, цIу-цIусса технологияр­ттугу ишла дуллай, лавайсса даражалул пишакартал хIадур буллай бушиву Дагъусттаннал медициналул университетрал.
Хъирив ДГМУ-рал зузалтран дуллунни личIи-личIисса наградартту. Университетрал ректорнал хIукмулийн бувну ВУЗ-рал хIурматлувсса профессортурал цIарду дуллунни цила чIумал му къуртал бувсса, ДР-лул ЦIуллу-сагъшиву дуруччаврил масъалар­ттаха зузисса Халкьуннал Мажлисрал комитетрал председатель В. Ханалиевлун, оториноларингологиялул элмийсса клиникалул центрданул директорнал хъиривчу Х. Давудовлун, Блохиннул цIанийсса Онкологиялул центрданул хирургиялул отделениялул заведующий А. Расуловлун ва мукунна цайминнан.
ДР-лул цIуллу-сагъшиву дуру­ччаврил министр Танка Ибрагьимовлун дуллунни медаль «За заслуги перед ДГМУ».
Шадлугърал ахирданий ккаккан дунни концерт. Мажлис къуртал хьунни цинявппагу шикку гьуртту хьун бувкIминнал цачIу ВУЗ-рал зузалтрал чивчусса ДГМУ-лул гимн учаврийну.