«ХIайран бувунну Дагъусттаннал тIабиаьтрал ва халкьуннал»
Сочилий вай гьантрай гурну ва яргну дайдирхьунни студентътурал ва жагьилтурал фестиваль. Аьрасатнал миллатир­ттащал, миннал культуралущал, багьу-бизулущал жагьилтал кIул буллай, билаятрал регионнайгу ми хьунабакьлай, хъамалу буллалисса чялишсса мероприятияртту най дур.

[dropcap]К[/dropcap]кавкказуллал регионнавухсса ца жулла республикалийн бувкIун буссар чил хIукуматирттаясса хъамал.
Цаппара гьантрал хьхьичI хьусса жагьилтурал ишир­ттал министрнал пресс-конференциялий тIийкун, октябрьданул 15-нний жула жагьилтурал хъамаллуран кка­ккан дурну дур Дагъусттаннал язисса тIабиаьтрал караматру. ХьхьичIва-хьхьичI лавгун бур Казбековуллал райондалий­сса Сулакьрал каньон ккаккан. Шиккува кIицI лаган, Сулакьрал каньон США-навусса Колорадо штатрайсса цIа ларгсса Гранд-каньондалуяр куртIсса, амма ванияр кутIасса каньондалун ккаллийссар. Жулламур каньондалул куртIшиву 1920 метра дусса дур. Ва тIабиаьтрал гьайкалданий тамаша бан жучIанма гьар шинах бучIайссар хIат-хIисав дакъасса туристътал, хъамал.
«Мадарасса ххуллул манзилгу бивтун, ахиргу жун ккарккунни ва аьламатсса каньон. ХIайп учинсса кIану къаливчIунни ва ккаккайхту. ХIайран бувунну мукунма зул халкьуннал хъамалушиндарал, дакIру тIитIаврил, хъиншиврул», — буслай ур Палангнавасса Артур тIисса жагьил.
Хъирив хъамал бувцуну бур машгьурсса тIахIунтту дувултрал шяравун – Бархъалав. Ши­ккугу вай, жула хъинсса аьдатрайну хъамалугу бувну, тIахIунтту дувултрал касмулущал, синааьрщарал «ссигъращал» кIул бувну бур. Гихунмайгу вай буккансса аьрххирду чансса бакъар. Миннувух Дарбантлив ва Сарикъумрайнгур биянтIисса.