Федерал даражалул давуртту канилух дурксса инсан

Владимир Путин хьунаавкьунни Дагъусттаннал БакIчинал кIанайману итан наниманащал

Октябрьданул 5-нний Дагъус­ттаннал БакIчинал кIанайма Владимир Васильев увкIунни республикалийн. Аэропортрай му хьунаавкьунни Дагъусттаннал парламентрал спикер Хизри Шихсаидовлул, ДР-лул ХIукуматрал председатель Аьбдуссамад ХIамидовлул, ДР-лул БакIчинал ва ХIукуматрал администрациялул каялувчи Исмяил Эфендиевлул, АьФ-лул Президентнал СКФО-райсса вакилнал аппаратрал ДР-лийсса хъунама федерал инспектор Василий Колесниковлул. ХIакьину официалну ккаккан антIиссар региондалул БакIчинал кIанайма Владимир Васильев. Микку гьуртту хьунтIиссар АьФ-лул Президентнал СКФО-райсса вакил Олег Беловенцев, АьФ-лул ПаччахIлугърал Думалул депутатътал, ДР-лул Халкьуннал Мажлисрал депутатътал, респуб­ликалул властьрал бартбигьаврил органнал каялувчитал ва цаймигу.
Муния гьартану бусанну хъиривмур номерданий.

Октябрьданул 3-нний АьФ-лул Президент хьунаавкьунни Владимир Васильевлущал ва мунахь бувсунни му итан най ушиву Дагъусттан Республикалул бакIчинал кIанайману.
ПаччахIлугърал БакIчинал увкунни: «Вин кIулссар Дагъусттан бушиву билаятрал ца яла агьаммур регион. Та хъинну ххаллилсса республикар. Танил ххуйшиву, тIабиаьтралссаннияр ххишала, ти­ккусса агьалиналссагур цалчинна-цалчин дусса. ЧIярусса давуртту дуллай бур, дур цаппара хъин чулийннайсса дахханашивурттугу, амма щаллу къабувсса масъалартту уттигу къачансса ливчIун бур.
Ттун ччай бур республикалул бакIчину итан федерал даражалул давуртту канилух дурксса инсан. На вихь тавакъю буллай ура республикалул каялувчинал къуллугърай ацIан ялунсса сентябрьданийннин. Муния махъ хьунтIимургу вийнгу, вил давурттайнгу хъар хъанай бикIантIиссар. Цанчирча, му чIумал дурсса давурттах бурувгун, Дагъусттаннал агьалинал вакилтурал кьамул бан­ссар багьайсса хIукму».
Ихтилатраву Владимир Путиннул кIицI бунни Владимир Васильевлул МВД-лий ва ПаччахIлугърал Думалий тамансса ишру бартбивгьушиву. «Ина ура федерал даражалул политик. Ттул пикрилий, ина кунасса инсан аьркин­ссар хIакьину республикалун», — увкунни В. Путиннул.
Владимир Васильевлул бувсунни цалла цуксса захIматсса даву бакIрайн ласлай уссарив ва цащава шаймур буван хIадурну ушиву. «На хIарачат банна даву дакIнийхтуну, жаваблувну дуллан, кIанттул зузалтрайн чулгу бивщуну. Ца чIумал на тикку зий ивкIссара, тай шинну къабигьасса дия. На уттигу дакI марцIну биттур булланна ттуйвасса бурж, Да­гъусттаннал тархъаншиву ххирасса, пагьму-гьунар бусса, чIявумиллатру бусса халкьуннайн умудгу бивхьуну», — увкунни Владимир Васильевлул.

Аьрасатнал Президент Владимир Путиннул ХIукмулийну Рамазан АьбдуллатIипов чIун дукканнин мурахас увунни Дагъусттаннал БакIчинал къуллугъраяту цала хушрайну.
Дагъусттан Республикалул БакIчинал къуллугърайн увчIусса инсан къуллугърай ацIаннин региондалул БакIчинал кIанай чIумуйсса ивтунни Васильев Владимир Аьбдуаьлиевич.

Васильев Владимир Аьбдуаьлиевич – «Единая Россия» партиялул Лахъмур советрал Бюрорал член, «Единая Россия» партиялул Генеральный советрал Президиумрал член, Аьрасатнал Федерациялул Федерал Собраниялул ПаччахIлугърал Думалул Председательнал хъиривчу, АьФ-лул ФС-лул ПаччахIлугърал Думалул «Единая Россия» фракциялул каялувчи.
Увссар 1949 шинал августрал 11-нний. 1972 шинал къуртал бувссар Москавуллал СССР-данул МВД-лул милицанан хасъсса дянивмур даражалул школа, 1978 шинал – Щалвагу союзрал юридийсса заочный институт, 1991 шинал – СССР-данул МВД-лул академия. Юридийсса элмурдал кандидатри.
1967-1968 шиннардий – Точный приборостроениялул НИИ-рал зузала.
1968-1970 шиннардий – Совет Аьралуннаву къуллугъ бувссар.
1972-1983 шиннардий — Москав шагьрулул РУВД-лул БХСС-рал отделданул силисттачи, инспектор, хъунама инспектор, отделданул хъунаманал хъиривчу, отделданул хъунама.
1983-1987 шиннардий – Москавуллал ГУВД-лул УБХСС-рал хъунаманал хъиривчу.
1991-1992 шиннардий – РСФСР-данул МВД-лул управлениялул инспекциялул хъунама инспектор.
1992-1993 шиннардий – АьФ-лул МВД-лул Штабрал Хъунмур инспекциялул хъунама инспектор.
1993-1995 шиннардий – МВД-лул Штабрал хъунаманал хъиривчу – Оператив управлениялул хъунама.
1995-1997 шиннардий – Москавуллал ГУВД-лул хъунаманал 1-ма хъиривчу.
1997 шинал – АьФ-лул МВД-лул сакин дурсса преступностьращалсса талатаврил Главный управлениялул хъунаманал 1-ма хъиривчу.
1997-1999 шиннардий – АьФ-лул виваллил иширттал министрнал 1-ма хъиривчу.
1999-2001 шиннардий – АьФ-лул Мюхчаншиврул Советрал секретарьнал хъиривчу.
2001-2003 шиннардий – АьФ-лул виваллил иширттал министрнал хъиривчу – статс-секретарь.
АьФ-лул ФС-лул ПаччахIлугърал Думалул депутат (2003-2007 ш.ш.), ПаччахIлугърал Думалул Мюхчаншиврул комитетрал Председатель, «Единая Россия» фракциялул член.
2010 шинал сентябрьданийннин – «Единая Россия» партиялул Тверь шагьрулул региондалул отделениялул Политикийсса советрал секретарь.
2011 шинал декабрьданул 4-нний увчIуссар ряххилчинмур батIаврил ПаччахIлугърал Думалул депутатну. ПаччахIлугърал Думалул мюхчаншиврул ва коррупциялийн къаршишиврул комитетрал член.
2016 шинал сентябрьданий увчIуссар арулчинмур батIаврил АьФ-лул ФС-лул ПаччахIлугърал Думалул депутатну, «Гражданский контроль» тIисса партиялул проектрал каялувчи.
Дуссар милицанал генерал-пол­ковникнал цIа.
Ванан дуллуссар «Буттал кIанттул хьхьичIсса лайкьшивурттахлу» тIисса IV даражалул орден, Чувшиврул орден, ХIурматрал орден, мукунна чIярусса медаллу.
ХIадур бувссар ХI.Аьдиловлул