СССР-данул Виричу ЦIаххуй Маккаевлун 100 шин там шаврин хасну

1941-ку шинал Совет хIукуматрайн бувкссар хъунмасса бала. Байбивхьуссар немецнал фашистуращалсса дяъви. Дагъусттанная дяъвилийн лавгссар чIявусса чиваркI, миннавух – чIявусса лакгу. Лакрал районная увккун ур 5 виричу: 3 – Лакрал, 2 – Ккуллал районная. Жул, ЧIяйннал шярава, Маккаев ЦIаххуй акъа, уссар СССР-данул Виричу Кузнецов Рамазангу. Ванансса гьайкал дацIан дурну дуссар Украиннай. На утти чичин ччай бура ттула къатта лях бакъасса чIаххучуная, гъанчуная, Виричунал цIа ларсун цIарава увкIсса Маккаев ЦIаххуй Маккашариплул арсная.

ЦIаххуй увну ур ЧIяйннал шяраву 1917-ку шинал сентябрьданул ахирданий. Буттал кIанттул цIанийсса хъунма­сса дяъви байбивхьукун, лавгун ур цанна ххирасса ватан дуручлан. Маккаев ЦIаххуйл бивтун бур Сталинградраяту Берлиннайн бияннинсса аьрали ххуллу. Къизгъинсса талатаврил лахIзарду цикссагу хьуну бур. ЦIаххуйл цIа бюхттул хьуну дур душманнал танкарду ххит дуву хIисаврай. ЧIярусса наградар­ттан ккаккан увну ур.
Сентябрьданул 30-нний ЧIяйннал шяраву кIицI лагарду жула шяраву увсса, хъуна хьу­сса СССР-данул Виричу Ма­ккаев ЦIаххуйл 100 шин шаврил байран. Ва хьунни хъинну ххуйну, ляличIину, тяхъану. Ва кьинилийн хIадур хъанай жул шяраваллил агьалинал сайки 2 барз хьунни. Хъунмасса кумаг бунни райондалул хъунама Сулайманов Сяидлул. ХхюцIалва машина щамарал бивчунни шяраваллил кIичIиртту, ххуллурду къулай бан. Ванала хъирив жула администрациялул хъунама МахIаммадов Исял, шяраваллил жямат субботникирттайн буккан буллай, гьарца кIанттай марцIшиву дунни. Ванан кумаг буллай ия Амиров МахIаммад-Султангу. Щаллусса барз бунни кьатIух зий Аьбдуллаева Маржанатлул, Алхасова СалихIатлул. Кумаг буллай бия школалул оьрчIругу. Иш-тагьар цукун дурив, цума ци дуллай урив ялув бавцIуну, ялтту буклай бивкIунни райондалул хъунаманал хъиривмур Илиясова Саб­рина, администрациялул зузала Хизриев Шамххал, УО-ул каялувчи ХIаммакуева Альбина, цува Сулайманов Сяид.
Шяраву чIирисса чIумуй дунни ххуйсса давурттив, жул шяраваллил сий гьаз дурсса. ЧIявусса харжгу бувкхьунссар, амма шяраву ххуйшивур­тту чIярусса хьунни. Виричунал гьайкалданучIа хьунни агьалинащалсса хьунабакьавуртту. Шиккун бувкIун бия, лагма­сса щархъая ба­къагу, Дагъусттаннал шагьрурдая­сса, районнаясса чIявусса хъамал, балайчитал, къавтIалт. Гьай-гьайгу, бия жул шяраватусса лахъсса давурттай зузи­сса Шалласуев Шалласу, Айдаев МахIаммад, АьбдурахIманов ТIалхIат, Юсупов Юсуп, Юсупов АхIмад, Юсупов Аьжуб, ХIусманов МахIаммад ва цаймигу.
БувкIсса хъамал кьамул буван хъинну ххуйсса хIадуршинна дунни цIуну буллалисса спортзалдануву. Дукра дуван би­ххансса оьл буллунни СПК-лул чулуха. Дукра шахьлай бия АхIмадова Саманият, ванил хъирив Аьлилова Шавлухъ ва цаймигу.
Хъамал хьунабакьаву дунни ЦIаххуй Маккаевлул къатраву, мунал арсурвавращал Сапижуллагьлущал ва Маккашарип­лущал.
Шяраву му кьини ярмукIагу тIиртIуну дия ахттакьуннин. Щаллусса кьини най дия концерт.
Жу, Ккуллал райондалул агьали, ЧIяйннал шяраваллил жямат, мудан лавсун най бу­ссару Виричу ЦIаххуйл цIа, щяв къадихьлай, бюхттулну. Жун жула Виричу мудангу дакIний икIантIиссар. Барчаллагь вин, ЦIаххуй, жун ва байран дуван багьана хьусса!
Жула лакрачIа, щалагу Да­гъусттаннай тархъаншиву чан къахьуннав, кувннащал кув бавкьуну, нахIуну личIаннав, гьарца лакрал къатлуву виричу чан къахьуннав, хьхьичIра-хьхьичIгу – цIуллушиву.
Басират Мамедова,
захIматрал ва дяъвилул
ветеран
ш. ЧIяйми