Лакку душнил арцул медаль ларсунни

[dropcap]О[/dropcap]ктябрь зурул 19-нний Лондоннай къуртал хьунни паратхэквондолул VII-мур Дунияллул чемпионат. Жула билаятрая муний гьуртту хьуну бур паратхэквондолул Аьрасатнал цачIун дур командалувун бухлахисса Аьйшат Рамазанова ва Владимир Феофанов, цивгу Аьрасатнал лайкь хьусса тренер Евгений Головихиннул вардиш буллалисса. Му чемпионат­рай Аьйшатлул ларсун дур арцул медаль.

Зулайхат Тахакьаева
[dropcap]Б[/dropcap]увну бур Аьйшат 1995 шинал МахIачкъалалий. Ванил нину-ппу Щардал шяраватусса бур. ЧIявусса оьрчIру бусса кулпат­раву Аьйшат бусса бур хъунма-хъунмур. Нину-ппу Ухссавнийн бивзсса чIумал ва бивкIун бур шиннарагу барткъаларгсса. Мунийн бувну, ватан кунма, аьзизсса шагьруну ванин хьуну бур цила оьрчIшиву ларгсса Нижневартовск. Шикку байбивхьуну спорт­равунсса цила цалчинсса ша­ттирду ласлай, чIявуссалийла хьуну бур Аьрасатнал чемпион, Европанал ва Дунияллул чемпионатирттал призер. Утти зий бур цила ялун бучIантIимунил ялув.
Ниттил лякьлувава киямур бартка дакъасса душ хIаятравун буккайхту, чIунархIал душваравасса ца даин байбишайсса бивкIун бур Аьйшат кьюкьин бансса махъру тIий, ганищал цайми душругу бялахълан къабитлай. Ганил тIурча, къулагъас къадай­сса диркIун дур. «Ниттил ттухь учайва оьрчIру ахIмакьссар, гайннан цичIав къабувчIайссар. Хъунма хьувкун ккаккан бува гьарцаннан инава цу буссарав. Вана на хъунма хьуну,» — тIий бур Аьйшат.


Бунияла, вана Аьйшат хъунма хьуну, нитти-буттан ххаришиврунсса, ватанлувтуран пахрулунсса ва Аьрасатнал цIа бюхттул дансса душ бувккун.
Аьйшат бусса бур, ца спорт­раву хьхьичIун личаву бакъассагу, гьарца чулуха итххявхсса душ – ххаллилну сурат дишайсса, музыкалува за бувчIусса, чIявусса луттирду буккайсса.
ХьхьичIва инсантурал итталун къабагьан лявкIуну, школалул иширттавухвагу тачIав гьур­тту къашайсса бивкIхьурчагу, спортраву хьусса цалчинсса тIайлабацIулул Аьйшат цийра дакI дацIан бувну бур.