Жабраиллул арс Жабраилов Аьвдурашид
Сентябрь зуруй Москавлия пашмансса хавар бивунни Ккурккуллал шяравун. Дунияллия лавгунни бусравсса агьлу-авладрал арс, ххаллилсса аьлимчу, Жабраиллул арс Аьвдурашид Жабраилов.
[dropcap]А[/dropcap]ьвдурашид увну ур 1939 шинал Ккурккуллал шяраву.
1957 шинал арцул медальданущал школагу къуртал бувну, увххун ур Азирбижаннал паччахIлугърал навтлил ва химиялул институтравун. Му къуртал бувну махъ увххун ур Ростовуллал политехнический институтрал аспирантуралувун. 1971 шинал Аьвдурашидлул лайкьну дурурччуну дур техникалул элмурдал кандидат хьунсса диссертация. Мура шинал зун айивхьуну ур дуки-хIачIия итадакьайсса Москавуллал технологиялул институтраву.
1973 шинал конкурсрал гьанулий ва ивтун ур кафедралул (кафедра автоматизации производственных процессов) доцентну. 1989 шинал Аьвдурашидлул дурурччуну дур техникалул элмурдал доктор хьунсса диссертация. 1990 шинал лайкь дурну дур профессорнал цIа.
1997-2012 шиннардий ва зий ивкIун ур кIава кафедралул каялувчину.
Аьвдурашид ия Дунияллул халкьуннал дянивсса энергоинформационный элмурдал академиялул академик. Ва хъанай ур 300-нния ливчусса элмийсса статьярттал автор. ЧIярусса шиннардий элмулул ххуллий бивхьусса захIматрахлу ва лавайсса даражалул пишакартал хIадур баврихлу Аьвдурашид лайкь хьуну ур ХIурматрал грамотарттан ва барчаллагьрал чагъардан. Ва ия захIматрал ветеран. Аьвдурашид ия хIал бавкьусса, тIул-тIабиаьт уздансса, хIакьсса интеллигент.
Аьвдурашид дунияллия лавгсса кьурчIишиву кIидачIлай, жижара буллай буру ванал кулпатрахь, душварахь, уссур-ссуннахь, цинявппагу гъан-маччанахь. Имандалий лавгун лякъиннав, рухI алжаннул ххари даннав.
Ккурккуллал жямат
Гьидалтил арс МахIаммадов МахIаммад
Вай гьантрай мукьцIал лавхъунни Шахьуйннал шяравасса ххаллилсса чув, хIурмат бусса хъуначу, Гьидалтил арс МахIаммадов МахIаммад аьпалул хьуну.
Увну ур МахIаммад 1928-ку шинал Шахьуйннал шяраву Гьидалтил ва Рукьижатлул кулпатраву. Ва чIивину унава ивкIуну ур ппу. МахIаммадлул захIматрал оьрму, га чIумалсса чIявуми оьрчIал кунма, байбивхьуну бур колхозрал давурттай зий. Буттал кIанттул цIанийсса Хъунмасса дяъвилул шиннардий, кьадиртун дуккавугу, зий ивкIун ур, дякъивух ва гъаравух, зунттаву ва къутандалий, хIухчуну. ЧIун дирукун, лавгун ур аьралуннаву къуллугъ буван. Муния махъ зий ивкIун ур Къазахъисттаннай къалайчину, щупирну.
Дагъусттаннайн зана хьуну махъ зий ивкIссар буттал шяраваллил колхозрай шупирну. Хъунма хIал къалавгун, бувну бур кулпат. 1972-ку шинал вайннал кулпат бивзун бур МахIачкъалалив. Му шиная тIайла хьуну, пенсиялийн укканнин зий ивкIссар МахIаммад МахIачкъалаллал 1-мур ПАП-рай шупирну. Махъ, шинну ларгун, миккува къалайчину (медник) зий ивкIссар. Чув зурчагу, МахIаммад лавайсса хIурматрай, бусравну ивкIссар.
МахIаммад ия дяъвилул ва захIматрал ветеран. Лайкь хьуну ия паччахIлугърал наградарттан, миннувух медаллангу.
МахIаммад ия буттал шяравалу, Лакку кIану, гъан-маччами ва дустал ххирасса инсан. Гъан-маччанал, кIулминнал дянив МахIаммадлул бусравгу хъунмая. МахIаммадлул хъинну усттарну бищайссия зюннав, так цаннара хасъсса, ляличIиссара такьвалий учайссия лакрал халкьуннал балайрду. Ванал зюннаврай рурцусса макьаннахун, увкусса балайрдахун цачIун хьуссар цикссагу кулпатру, Шахьуватуссагу, цайми-цайми кIанттурдаятуссагу.
Адаврай ва мяърипатрай хъуни бунни ванал цала шанмагу оьрчIгу, цалва кулпатращал Бикащал махъминнан эбратрансса кулпатрал кюругу щаллу бувну. Цала кIиягу арсная ва душния бивзсса оьрчIангу МахIаммад ия эбратрайсса ттатта, хIарачат буллайгу икIайва минналмур оьрмулувугу, тарбиялувугу шайссаксса хъунмасса бутIа бишин.
МахIаммадлул бивкIулул къумашиву кIидачIлай, дакIнийхтунусса жижара буллай буру кулпатрахь Бикахь, арсурваврахь Дивирдухь ва Баярдухь, душнихь Аидахь, арснал хъаннихь ва куявнахь, оьрчIал оьрчIахь Исламлухь, Илияслухь, Каринахь, Оксанахь, Камиллахь, ссихь Муъминатлухь, махъсса цинявппагу гъан-маччаминнахь. МахIаммадлул хьхьичI алжаннул къапурду тIитIиннав, ахир хайрданийн дукканнав.
Насу, МахIаммад, насу
Буттал аьрщи кIукIлунийн,
Гьав нурданул дурцIунийн,
Пирдавс-алжан булайнийн.
Шахьуйннал, КIундиннал
жямат
