[dropcap]В[/dropcap]ай гьантрай Расул ХIамзатовлул цIанийсса Миллатрал библиотекалий хьунни ДР-лул Культуралул министерствалул коллегиялул ирглийсса батIаву. Му дачин дурну бия ДР-лул культуралул министр Зарема Буттаева.

Бадрижамал Аьлиева
[dropcap]З[/dropcap]арема Буттаевал батIминнан кIул бунни коллегиялул цIу бу­ккан бувсса коллектив. Му коллективравун мукунма бухлай бур: ДР-лул Халкьуннал Мажлисрал КIулшиву дулаврил, элмулул, культуралул, жагьилтурал иширттал, спортрал ва туризмалул комитетрал председатель Ражав АьбдуллатIипов, ДР-лул БакIчинал ва ХIукуматрал Администрациялул Сакиншиндарал ва проектрал управлениялул каялувчи Октай Багишиев, «Дагъусттан» ГТРК-лул гендиректорнал хъиривчу Ссалам Хавчаев, Оьруснал театрданул директор Тимур МахIаммадов, Дарбантуллал музыкалул училищалул директор Камила МахIмудова.
Ва ххуллухсса батIавривух гьурттушинна дунни ДР-лул Халкьуннал Мажлисрал депутат, КIулшиву дулаврил, элмулул, культуралул, жагьилтурал иширттал, спортрал ва туризмалул комитетрал председательнал хъиривчу Анна Безруковалгу.
ЦIакь хьусса аьдатрайн бувну, батIаву дайдирхьунни культуралул давриву итталун дагьансса ккаккиярттайн лавхъсса, хьхьичIун ливчусса зузалтран паччахIлугърал ва АьФ-лул ва ДР-лул Культуралул министерстварттал чулухасса наградар­тту дулаврия. Ва ххуллух бахшиширттан лайкь хьуминнавух ия лакраву ва дагъусттанлувтураву чIявучин кIулсса, хIурматрайсса, Хъусращиял шяравасса Мюрщиев Мирзагу. МахIачкъала шагьрулул Аьрасатнал халкьуннал аслийсса культуралул центрданул начальникну ивтун хъунма хIал къавхьунугу, Мирзал итталун дагьансса давурттив дурссар. Ва кьини ванан ДР-лул культуралул министрнал чулухасса Барчаллагьрал чагъар буллунни. Мура бахшишран лайкь хьунни ЦIуссалакрал ва Ккуллал районнал Культуралул управлениярттал бакIчитал – ХIабибат Буттаева ва Марина Ибрагьимовагу.
Гихунмай махъсса шиннардий жулла республикалий тIивтIусса Аьрасатнал халкьуннал аслийсса культуралул центрду ци тагьарданий буссарив бусласисса гьарта-гьарзасса док­лад бунни ДР-лул культуралул министрнал хъиривчу, ДР-лул Культуралул министерствалул Республикалул Халкьуннал творчествалул къатлул директор Марита МухIадовал. Ванил бувсунни 2013-ку шиная шинмай тIитIлай, хIакьинусса кьини республикалий бушиву 325 центр, аьмнурив цинявппагу бушиву культуралул ва бигьалагаврил 997 идара. ДР-лул БакIчи Рамазан АьбдуллатIиповлул бигарданийн бувну, гьарца центрданий сакин бувну бур «Варистал» («Наследники») тIисса цIанилусса жагьилтурал центрду. Миннул агьамми давурттугу дур жагьилтуращал ва оьрчIащал культуралул ва кIулшиву дулаврил давуртту дуллалаву.
Цалва-цалва центрдал давурттая бувсунни начальниктуралгу. Докладру ялагу бунни ДР-лул Культуралул министерствалул отделлал начальниктал Мухтар Кьурбановлул ва Жамиля НурахIмадовал, Республикалул дуккаврил ва методикалул центрданул директор Калимат Илдаровал ва м.ц..