Тимар буллалира элмулул шачIантту

[dropcap]С[/dropcap]ентябрь зурул 1-нний шадлугърал даражалий КIулшивурттал кьини кIицI ларгунни ЦIуминалийсса ЦIуссалакрал гимназиялий. ЦIусса дуккаврил шинащал оьрчIру барча буван бувкIун бия ДР-лул КIулшивуртту дулаврил ва элмулул министерствалул Аьмсса кIулшивуртту хьхьичIуннай даврил управлениялул консультант Лайла Арсланбагова, ЦIуссалакрал райондалул КIулшивуртту дулаврил управлениялул хъунаманал хъиривчу Светлана Къудаева.

[dropcap]К[/dropcap]Iулшивурттал кьинилущал оьрчIру барча буллалисса ва цIусса дуккаврил шин дайдихьлахьисса мажлис тIитIлай, ихтилат бувна гимназиялул директор Светлана Султановал. Ванил бувсуна ларгсса дуккаврил шиналсса хIасиллая ва барчаллагь увкуна школалул оьрмулуву чялишсса гьурттушинна дуллай, чIарав бацIлай бивкIсса нитти-буттахь.
— Ххирасса оьрчIрув, ттул хъунмасса умуд бур зу учительтуралгу, нитти-бутталгу був­сса захIмат щяв къабутанссар, хьхьичIунну дукланссару тIисса. ЧIа тIий бура зун тIалабацIуртту, чаннасса бучIантIимур, хьуннав зуяту цинявннан пахру-ххаралунсса инсантал, — увкуна директорнал.
Райондалул школарттай дуллалисса цинярдагу мероприятиярттай мудан чялишсса гьурттушинна дай КIулшивуртту дулаврил управлениялул вакил Светлана Къудаевал.
— На вихшалдарай бура ЦIу­ссалакрал шяравусса гимназия дуклаки оьрчIал оьрмулуву хъин чулиннайсса дахханашивуртту ва куртIсса кIулшивуртту дуллансса центрну хьунссар тIий, — увкуна ванил.
Ихтилатру къуртал бувну махъ хъуними классирттал дук­лаки оьрчIал хъарай щябивтсса чIивитIул бивщунни Цалчинсса гюнгутIи.
Мюрщулт цалчин парталух щябивтун махъ, Лайла Арсланбагова, Светлана Къудаева ва гимназиялул директор лавгуна 5-мур классрал каялувчи Эльмира Измаиловал цIусса информациярдал технологиярттан хас дурну дихьлахьисса дарсирайн.

ХIадур бувссар
Имара Саидовал