Европанал чемпионат дуллалиссар Дагъусттаннай

Августрал 24-нний Парижлив лачIун буккаврил дунияллул чемпионатрай хьуну бур U W W-рал бюрорал батIаву. Ганий гьуртту хьуну ур Дагъусттаннал ХIукуматрал Председатель Аьбдуссамад ХIамидов.

ХIасан Аьдилов
Республикалул лачIун бу­ккаврил федерациялул президент хIисаврай, премьер-министр ккаккан увну ивкIссар га батIаврий.
Дунияллул лачIун буккаврил цачIунбув бюрорал (U W W) члентурал цIакь дурссар 2018 шиналсса Европанал чемпионат Дагъусттаннай Каспийск шагьрулий дуван­сса кьутIи.
ЦIанасса ппурттуву Дагъусттан хъанахъиссар Аьрасатнал регионнава спортраву хьхьичIуннайшивуртту шаврил ца яла хьхьичIунминнувасса ца. 50 шинал мутталий регион хIисав хъанай бур дунияллийх цIа дурксса лачIунбуккулт хIадур баймурну. ХIакьинусса кьини ур 16 олимпий чемпион, миннавату 12 — лачIунукку.
«ХIакьину U W W-рал бюрорал батIаврий кьамул бувссар жунна хъуннасса агьамшиву дусса хIукму – 2018 шинал лачIун буккаврил Европанал чемпионат дантIисса шагьруну цIакь бувссар Каспийск», — увкунни Аьрасатнал ЛачIун буккаврил федерациялул председатель Михаил Мамиашвилил. Ганал циняв дагъусттанлувтурахь барчагу увкунни му агьамсса иш. Ва муницIунма кIицIгу бувунни му хъанахъишиву хъуннасса жаваблувшивунугу.
«Дунияллул чемпионат жулла республикалий даврил чIалачIи буллалиссар региондалий спорт, хаснува лачIун буккаву, хьхьичIуннай шавриву буллалисса хIарачатру», — увкунни Аьбдуссамад ХIамидовлул.