«ДакIнил куртIнива, щин кунма, экьинанисса»

[dropcap]М[/dropcap]ахIачкъалалив, Р. ХIамзатовлул цIанийсса Национал библиотекалий ларайсса даражалий кIицI ларгунни Дагъусттаннал халкьуннан нукIува ххира хьусса машгьурсса шаэр, чичу Миясат Щурпаевал «Арцул мухIлу» тIисса луттирал презентация.

Gagjieva

[dropcap]П[/dropcap]резентация хьунни, шаэрнал оьрмулул юбилей­ацIун дархIуну. «Арцул мухIлу» луттиравусса шеърирду оьрус мазрайн таржума бувну бур гьунар бусса шаэр, жяматийсса ишккакку Миясат Муслимовал. КIива лакку душнил, кIива Миясатлул гьунарду хIала бувххун, бувккунни дунияллийн ва ххаллилсса жуж.
Шаэрнал мажлисрай ихтилат буллалими, ца зумату кунма, буслай бия Миясат Щурпаевал шеърирду дакIнил куртIнива нанисса, ца-кIива ххуттайну щаллусса замана, халкьуннал багьу-бизу ккаккан буллалисса, авторнал тIул-тIабиаьт аьч дуллали­сса бушиву.
Миясат Щурпаевал шеърирду инсантуравун багьну бур, балайчитурал тIий бур, халкьуннал махъру кунма. Мунилгу бишлай бур Миясатлул поэзиялун лавайсса кьимат. Мунилгу буслай бур цуксса гъансса буссарив шаэр халкьунначIан. ЦIанасса, луттирдал сий лагьсса, поэзиялул кьимат чан хьусса, заманнай, Миясат Щурпаевал луттирду багьан къабитай, вай тIалавну бур, вай ккалай бур, вайннуя гъалгъа тIий бур.
Арулвагу барчаллагь, ва лу итабакьин кабакьугу бувну, поэзиялул мажлисрал сиптачи хьу­сса Миясат Муслимован, шаэрнал мажлис хъун бан бувкIсса Лариса ХIажиеван, Минажат Ухмачеван, цинявппагу шикку гьуртту хьуминнан.

Миясат Муслимова:
Москавуллал поэт, журналист Ольга Шевелевал Миясат Щурпаеван хас дур­сса цилла макьалалий чичлай бур: «Миллатрал лавгмунилгу, цIанамунилгу кьадру-кьимат бусса инсантал буссаксса, дуниял духкъалагантIиссар». Лавгмунилгу, цIанамунил ва бучIантIимунилгу дянивсса дахIаву дурсса шаэр бур Миясат Щурпаева. Цайми, цала луттирду итабакьияра тIий, луттирду итабакьай идарартту азурда буллалисса чIумал, хьхьичIун ххяхлан къакIулсса, циванни, ссан аьркинни тIисса Миясатлухь, «жун вил луттирду итабакьин ччай бур» тIий, миннат-суннатру буллан багьссар издательствалул зузалтран.

Руслан Башаев, «Илчи» кказитрал хъунама редактор:
Миясат Щурпаева кIива жяматрал — жула байтагъну хъанахъисса Гъази-Гъумучиял ва Лакку билаятрал баргъбуккавал чулийсса чIирисса Му­ккурдал шяраваллил душри. Ванил шеърирду бур цIуцIисса дакIнивату нанисса, лакрал, Дагъусттаннал литературалул ххазинану хьунсса, буккултрал дакIурдивун оьрмулухсса гъирагу, узданшиврухсса мякьгу бутлатисса.

Качар ХIусайнаева, АьФ-лул культуралул лайкь хьусса зузала:
Миясат Щурпаева кунмасса шаэр хIакьину Дагъусттаннай цамур бакъассар. Миясатлущалсса цалчинсса кIул шаву хьуссар ттул «НукIузаманнул хаварду» тIисса луттирайхчIин. Хьхьувай канил бувгьуну ва лу, кьабитан къахъанай, кIюрххилнин був­ккуну къуртал бувссия. Миясат лакрал литературалувусса Анна Ахматовар, Ахматовал, Цветаевал даражалийсса шаэрди ва. Ттул ппу Абачара ХIусайнаев мудан махIаттал хъанан икIайва лак­рал хъаннил поэзиялул гужшиврий, куртIшиврий.

Даниял Магьдиев, шаэр, педагог:
«Арцул мухIлу» тIисса луттиравусса Миясат Щурпаевал назмурду лакку мазрайгу, оьрус мазрайгу дуккав ва мукIру хьура цал ттигу жула лакку маз ссалчIавгу ялавай­сса бакъашиврий, жула мазрал аваданшиврий, пасихIшиврий. Миясат Щурпаева бур ляличIисса гьунарданул заллу. Ванил шеърирду бакъар тIалавшиндарах бурувгун чивчусса, лажин ляхълахъисса, вай бур дакIнил куртIнива, щин кунма, экьинанисса.

Роза Эльдарова, Дагъусттаннал паччахIлугърал университетрал доцент:
«Арцул мухIлу» луттираву чIявусса дакI гьулусан дуллали­сса шеърирду хьунабавкьунни. Ца-кIива ххуттайну чIярусса ва дакIний личIансса суратру ккаккан дан бювхъуну бур авторнаща. Луттирава чIалай бур авторнал кругозор хъуннасса душиву. Миясат Щурпаевал поэзия кьимат лахъсса халкьуннал поэзия бур.

ХIусайн Камалов, профе­ссор:
ХIакьинусса мажлис Миясат Щурпаевал творчество ххираминнан хъуннасса байран хьу­н­ни. Ххари хьунсса иш хьунни ва луттиравусса шеърирду ­оьрус мазрайн таржума бавугу, утти ми чIявуссаннаща буккин бюхъантIишивугу.

Аьбдул Оьмаров, Миясатлул ниттилссурахъу, шяраваллил хозяйствалул элмурдал кандидат:
Миясат Щурпаева бувссар дурккусса, бусрасса кулпатраву. Ванил ппу Нажмуттин 30 шинай цIа дурксса С. Габиевлул цIанийсса Гъумучиял колхозрал председательну зий ивкIссар ва му миллионерсса колхозирттал сияхIрайнгу ларсун диркIссар. Шяраваллил хозяйствалул министерствалий ХIурматрал ул­ттуйн лархъун диркIссар ванал цIа, хьхьичIунсса каялувчи хIисаврай.
Нину учительницая. Вайннал тарбия бувссар 9 оьрчI. Укунсса кулпатраву, Миясат кунма, гьунар бусса душ ляхъаврий цичIав махIаттал хьунссагу бакъар.

Гулизар Султанова, искусст­вовед:
Миясатлуя циксса куртIссагу, лахъссагу махъру учирчагу, къачIявуну чIаланссар тачIав. «Ккашилнал лякьагу, мякьнал кьакьаригу кIулсса», бакIрай мусил таж бусса ххаллилсса шаэрди ва.

Андриана Аьбдуллаева