[dropcap]К[/dropcap]куллал райондалул ветеринар управлениялул цивппа зун бивкIния мукьах дурсса давурттах бурувгукун, му идаралул райондалул агьали ва ризкьи азардая буручлай дурсса давуртту лажин кIялану дурссар ва дуллайгу буссар.
[dropcap]К[/dropcap]куллал ветуправлениялул тарихрах бурувгукун, райондалий ветеринар хIакинтурал идара зун байбивхьуну бур 1935-ку шиная шинмай. Тания шиннай тамансса дахханашивуртту хьуну дур.
ХьхьичIппурттуву ветеринар къуллугърай райондалий зий бивкIун бур 5-6 инсан. Ми цивппагу бивкIун бур дянивсса ветеринар кIулшиву дусса. ЦIанасса ппурттуву ветеринар къуллугърай зий бур 60 инсан. Миннава ларайсса кIулшиву дусса ветеринар хIакинтал бур 26, фельдшертал – 12, гайми — техникалул зузалт.
Буттал кIанттул цIанийсса Хъун дяъви байбишиннин райондалул ветеринар къуллугърай каялувшиву дуллай ивкIун ур ЦIущуллал шяравасса Мирзаев ХIасан, мунаяр махъ — ГьунчIукьатIатусса ХIусайнов ХIусайна ва Х1ажимирзаев ХIажимирза, хъирив — Ваччатусса Муслимов Юнус, Хъусращатусса МахIаммадов Давди , Ваччатусса Мустапаев Мустапа , Ссухъиятусса АьхIмадов Аьли , Ккулатусса Буржунов Мяъсуд, Хъусращатусса МахIаммадов Шамхал, 1-мур ЦIувкIратусса СантIуев МахIаммад, ЧIятусса МахIаммадов Ибрагьимхалил , Хъусращатусса Илиясов Муса , Вихьлиятусса Аьлиев Оьмари . ЦIанасса ппурттуву ветуправлениялул хъунаману зий ур ХIажирамазанов Будайчи (Ккулатусса).
Ветеренар къуллугърал идара зун байбивхьусса шиннардий райондалий ччамарду буллай диркIун дур ризкьилия кувнния кувннийн ва инсаннайн лахъайсса, нигьачIаву дусса азарду: балчантрал азар — сап, бруцеллез, ящур, туберкулез, ссибир язва. Ветеринар къуллугъчитураща бювхъуну бур 1935-1936-ку шиннардий райондалия дучрал азар сап духлаган дан, мукунна ризкьилийн диллалисса ссибир язва дайщун дан.
ЦIанасса ппурттуву райондалул ветуправлениялувун бухлай бур шанна участкалул ветлечебница, арулла ветеринар участок.Миннува кIива ветлечебница ва кIира участок дуссар Бакрис-Бажиганнал аьрщарай. Ца участок дуссар Бабаюртуллал райондалий.
Гьай-гьай, вай ветлечебницардай ва участокирттай зий бивкIссар ва зий буссар цала даву ларайсса даражалий кIулсса пишакартал. ЧIярусса шиннардий зий бивкIсса хIакинтал цIана бигьалаглай бур. Миннавух бур: Буржунов Мяъсуд (Ккулату), МахIаммадов Ибрагьинхалил (ЧIяту), МахIаев МутIа (Ккулату), АхIмадов Рамазан (Хъусращату), Расулова Шура (Вихьлияту) ва цаймигу.
ХIакьинусса кьинигу буххаву дакъа зий бур Мирзаев Аьппас, Мурачуев Гьарун (Ккулату), Закарьяев Рамазан (Хъусращату), Кусаев Шяъбан (1-мур ЦIувкIрату), Аьлиев ЦIаххуй (СумбатIлияту), МахIаммадов Шяъван (Вихьлияту) ва цаймигу.
Барча дуллай ветеринар зузалтрал кьинигу вайннангу ва вай шикку кIицI къабувминнангу чIа учинну цIуллушиву ва давурттаву хьхьичIуннайшивуртту.
Арсен Аьбдуллаев
ХIажимурад ХIусайнов
