Жижара

Августрал 28-нний оьрмулул 89 шинаву дунияллия лавгунни хъунасса аьлимчу, ххишала акъа ххаллилсса, ур чинсса лаккучу, буттал ватан ва миллат ххирасса Аьбдулкьадирдул арс Дандамаев МахIаммад.

[dropcap]М[/dropcap]ахIаммад увну ур 1928 шинал сентябрь зурул 2-нний, тани Да­гъусттаннай увагу усса ххюя учительнавасса цаннал кулпатраву. Ва Дагъусттаннай хьусса аьлимчу акъая. Ва ия, Ленинградрай яла хьхьичIунмур тарихрал институтгу бувккуну, яла Москавлив РАН-далул аспирантурагу бувккусса, мяйжаннугусса аьлимчу. Ва ­акъая цIардал, орденнал хъирив лечлачисса, ми тIалав дувайсса адамина. Ванал щала оьрму элмулуха, тарихраха зий лавгунни. Ванан хъинну ххирая буттал улча. Гьарца шинал учIайва Лаккуйн. Ва ия дяъвилул шиннардий колхозрал даврий хъунмасса захIмат бивхьу­сса жагьил.
Шиккува кIицI бан ччай бур ца аьжаивсса затгу:
«Илчилул» редакциялий август зурул 28-нний дуссия ирглий­сса «планерка». Микку редактор Руслан Башаевлул увкуна: «Ва номерданий жуна МахIаммад Дандамаев барча уван аьркинни, ванан 89 шин хъанай дур сентябрьданул 2-нний. Ялун юбилей хьуннин ва жущала личIавив-къаличIавив жунма кIулнугу бакъахьувкун», — куну. МахIатталсса иш. Русланнул муная ихтилат буллалисса чIумал, МахIаммад ца мутталул хьхьичI дунияллияту лавгун ивкIун ур.
Махъсса чIумал буллай бивкIсса ихтилатирттаву МахIаммад Дандамаевлул учайва: «Къанясив хьун най бур ттун ттула буттал къатрал ларзулату Лакрал зунттурдах урган», — куну. Хъунмасса барчаллагь ванал душнин Марияннун, цила буттал аманат биттур був­сса, жула МахIаммад цала буттал шяравун ГьунчIукьатIув лавсун бувкIсса уччин.
Ванал цIардая, орденная, хIурматрал лишанная шикку чичлан пайда бакъар. Амма Аьбдуллаев Эсал увкуну бивкIсса махъру чичинну: «МахIаммад кунасса аьлимчу дунияллийн ттинин къаувкссар, му кIулссар дунияллул аьлим­турангу».
МахIаммадлул бивкIулул кьур­чIишиву кIидачIлай, жижара буллай буру ванал уссурваврахь, ссихь, кулпатрахь, душнихь, ссурахъаврахь, гъан-маччаминнахь, щалагу лакрал миллатрахь.
Цал бунагьирттал аьпа баннав, алжаннул ххари аннав!
ГьунчIукьатIрал жяматрал
чулухату Амин Аьбдуллаев


Сардардул арс Жамалханов Муслим
Уттигъанну оьрмулул 60 шинаву жуятува лавгунни яхI-къириятрал заллу, дугърисса, хъиншиврул бутIа ххишалану буллусса уздансса ла­ккучу, Маркьатусса Сардардул арс Муслим.

Увну ур Муслим августрал 18-нний 1957 шинал Каспийск шагьрулий. Школа къуртал байхту, зун лавгун ур заводрайн токарьнал ученикну. Ччимур журалул захIматсса деталь паргалну дувайсса усттар хьуну ур ваная, амма къавтIаврихсса ччаврил увцуну ур ва «Дагдизель» заводрал культуралул къатлувун. Шинал лажиндарай «Горцы» тIисса ансамбльданул солист хьуну ур. Шиккува ялун ливчуну бур музыкантнал гьунаргу. Аьралий бурж биттур бувну махъ увххун ур Культпросветучилищалийн. МарцIсса ххювардай вагу къуртал бувну, ваная хьуну ур ххаллилсса музыкант.
Зий уссия Муслим Культпросветучилищалий, «Лезгинка», «Дагестан» ансамбльлаву музыка бишлай, агьалинал дакIру ххари дуллай.
Чув зий унугу, Муслиннул кка­ккан бувссар цува, ххуйсса музыкант ушивруцIун, аьчухсса дакIнил заллугу ушиву. Мунияту ишин-итан кIану бакъа ххирая ва дустурангу, лагма-ялттунангу, архIал зузиминнангу.
ХIайп, лавгунни, чIун дуранура, жуятува ххаллилсса кулпатрал заллу, хъинсса ппу, вихшаласса дус. Бувтссар ванал цала оьрму марцIну, тIайлану, чил аьй къаданну, дакI мяш хьунну. Кулпатралгу, дустуралгу, гъан-маччаналгу дакIурдиву мудан сагънува икIантIиссар Муслим.
Муслим аьпалул хьусса кьур­чIишиву кIидачIлай, жижара буллай буру кулпатрахь, душварахь, гъан-маччанахь, агьлу-авладрахь, махъсса цинявннахьвагу.
Цал гьав нурданул дуцIиннав, алжаннул ххари аннав. Махънал оьрмурдай барачат бишиннав.
Къяннал, Маркьиял, ХьурукIуллал жямат, дустал, гьалмахтал


Аьлиллул душ Гъужиева ПатIимат
Вай гьантрай дунияллия лавгунни ЧIяйннал шяравасса Аьлиллул душ Гъужиева ПатIимат. ПатIимат бувну бур 1932 шинал. 1955 шинал Ккурклиясса Нуруллагьлун щар хьуну, мунияр шихунмайсса оьрму ПатIиматлул Ккурклив лавгун бур.

Ккурккуллал ванийн Нуруллагьхъай учайссия, жяматрачIа ванил хIурматгу хъунмассия. Чил шяравун бувкIун, шяраваллил халкьуннащал мазгу лявкъуну, лайкьну, узданну оьрму бувтсса хъамитайпар ва. Зий бикIайссия ПатIимат Мичуриннул цIанийсса Ккурккуллал колхозраву. БикIайссия складрал хъунмурну, бригадирну, бувчIуну бивкIссар шяраваллил советрал депутатну. ПатIимат бия захIмат ххирасса, дан-дитан кIулсса хъамитайпа. Колхозрал давурттай бивхьусса захIматрахлу лайкь хьуссар цикссагу грамотарттан ва медаллан. Щаллусса кьини колхозрал давурттайх бунугу, ужагъгу мудан лазиларкьуну, марцIну дикIайва. ПатIимат бия иминсса, чIахху-чIарахнащал хIал бавкьусса инсан.
Ванил бивкIулул кьурчIишиву кIидачIлай, жижара буллай буру арсурваврахь, душаврахь, махъсса гъан-маччанахь. Имандалий лавгун лякъиннав, рухI алжаннул ххари даннав.
Ккурккуллал
ва ЧIяйннал жямат


ХIажинал душ Ибрагьимова Лимунат

Лахъисса хIаллай къашавайгу бивкIун, оьрмулул 77 шинаву аьпалухьхьун лавгунни гьарца ххуллу-ххуттай бавкьусса, дакI-аьмал уздансса, гьарцаннал чIарав бацIайсса, цIуцIаву рахIат дайсса хъамитайпа-хIакин, КIундиннал шяравату­сса ХIажинал душ Ибрагьимова Лимунат.
Лимунат бувну бур 1940-кусса шинал. Бувккуну бур КIундиннал дянивмур даражалул школа. Школа къуртал бувну махъ зий бивкIун бур янна дуруххуну, дарзину. Яла къуртал бувну бур медициналул училище (1966 ш.). Мукьра шинай зий бивкIун бур медсестрану зун­ттал шяраваллаву. 1971-ку шинал, щар хьуну, лавгун бур Душанбайлийн. Тийх 1995-ку шинайн бияннин зий бивкIун бур операциярттал медсестрану. Тиха зана хьуну мукьах Лимунат зий бивкIссар Карашрал медициналул пунктрай. Махъсса шиннардий зий буссия цила буттал шяраву цила пишалий.
Ванил хIалал дурссар «Да­гъусттан Республикалул лайкь хьусса медициналул зузала» тIисса бусравсса цIагу. Ва хъанахъиссар захIматрал ветерангу.
Лимунат аьпалухьхьун лагаврил пашманшивугу кIидачIлай, дакIнийхтунусса жижара буллай буру ванил оьрмулул дус Расуллухь, уссу-ссурваврахь ва махъсса цинявппагу гъан-маччаминнахь.
Цил бунагьирттал аьпа баннав, рухI бигьаний дишиннав!
КIундиннал
ва Карашрал жямат