[dropcap]Т[/dropcap]ерроризмалийн къаршисса форум хьунни Лакрал райондалул администрациялий, «Жу терроризмалущалссава экстремизмалущалсса талатаврихлу буру» тIисса республикалул форумрал хъирив гьантрайра. Муний гьуртту хьунни райондалул бакIчи Юсуп МахIаммадов, Аьра­сатнал МВД-лул «Лакский» МО-лул каялувчи Юсуп Амиров, Лакрал ва Ккуллал райондалул прокурорнал буржру биттур буллалисса Сяид МухIадов ва цаймигу идарарттал каялувчитал.

Зулайхат Тахакьаева
Юсуп МахIаммадовлул кIицI лавгунни цукун захIматсса тагьар диркIссарив республикалий ххюра-ряхра шинал хьхьичI терроризмалул ва экстремизмалул пикрирду сававсса. Махъсса шиннардий му тагьар лагь хьурчагу, терроризмалул ва экстремизмалул суаллах­сса къулагъас хьхьара хьун ритан къабучIиссар, цанчирча, агьали паракьат хьунгу бивтун, мунил щатIи ча бухьурчагу бишлай буну тIий.
Терроризмалущал ва экстремизмалущал талатаврил ялув райондалий дурсса давурттая бувсунни администрациялул терроризмалийн къаршисса отделданул каялувчи МахIаммад Гадаевлул. Ихтилатру бунни Юсуп Амировлул, УО-рал каялувчи Явсупи ХIамзаевлул, Жагьилтурал ва спортрал комитетрал каялувчи Малик ХIусмановлул, шяраваллал администрациярттал бакIчитурал, школарттал директортурал ва Гъумучиял мизитрал имам МухIаммад Бариевлул.