[dropcap]А[/dropcap]панни Къапиевлул цIанийсса Лакрал музыкалул ва драмалул театрданул даврил ца агьамсса ххуллуну ккаклай бур жагьилтуращал зузаву. Аьдатравун дагьну дур экстремизмалийн къаршисса акция– «Театр ва жагьилтал». Ва акциялул лагрулий ларгсса кIира шинал лув-ялув ккаккан бувссар Апанни Къапиевлул аьрали чичрурду гьануну ларсъсса спектакль «Духкъалагайсса макь». Ва базилух ккаккан бунни Совет Союзрал кIийла Виричу АхIмад-хан Султаннуясса спектакль.
Зулайхат Тахакьаева
[dropcap]П[/dropcap]ьеса чивчуну бур украиннал драматургтурал – Гарольд Бадыкиннул ва Светлана Челсил. Режиссер – Марина Карпачева, художник – ДР-лул лайкь хьусса художник Аскар Аскаров, композитор – ДР-лул магьирлугърал лайкь хьусса ишруккакку Ирина Нахтигаль. Спектакльданул премьера хьуссар 2010 шинал, Ххувшаврил 65 шин шаврин хасну.
Сталиннул заманнайсса террорданул, яни репрессиярттал, мугьалттухьхьун биривну бур виричунал ниттил миллат – татар. Мува щавщи бивссар виричунал бутталмур миллатрайнгу – цала миналия бизан бувссар Хъун ЦIувкIуллал шяраватугу тамансса кулпатру.
Дунияллий яла оьттул ттур дуркмур дяъвилий Ххувшаву ларсун арулцIалунниха лирчусса шинну гьарчагу, дакъар хIакьину жула аьрщарай паракьатшиву.
«Дяъвилий ттун кIула душман цумаяв, танайн цукун данди ацIан аьркинссарив. ЦIанакул тIурча, ттун къакIулли жула вивсса душмантурал ттунна чув луркIан дуккантIиссарив», — тIисса спектакльданувасса АхIмад-хан Султаннул махъру бакьлай бур махъсса кьурахъул шиннардил лажиндарай Дагъусттаннайгу, цайми-цайми кIанттурдайгу хIасул хъанай диркIсса тагьардануцIун.
Спектакльданийн бувкIун бия МахIачкъала шагьрулул 1-мур школалул ва ятинсса оьрчIансса школа-интернатрал оьрчIру. Гьуртту хьунни акциялий ДР-лул ХIукуматрачIасса диннал иширттал комитетрал консультант Минкаил Минкаилов ва мува комитетрал зузала ГъазимахIаммад Мухумагъазиев.
