Франциянавату царагу мусил медаль къадуркIунни

[dropcap]Ф[/dropcap]ранциянал Париж шагьрулий дайлиртIунни лачIун буккаврил дунияллул чемпионат. Аьрасатнал цачIундур командалул къаларсунни царагу мусил медаль — я илкинсса журалий лачIун буккаврий, ягу грекуллал ва румуллал журалий лачIун буккаврий, ягу душру-хъаннил дянивсса лачIун буккаврий. Жулла командалул ларсун дур 5 арцул ва 5 чарвитул медаль. ЛичIину илкинну лачIун буккаврил вакилтурал дурххуну дур 5 медаль: 3 арцул ва 2 чарвитулсса.

ХIасан Аьдилов
Аьвдурашид Сяъдуллаевлул лачIун уккаврих ялугьлай бия циняв, тамашалух хъиннува гъира бизан бансса ишгу хьуну бия: ганал чурххал кIулшиву хьхьичIра 86 кило дикIайссия, утти ганал чурххал кIулшиву 97 килорайн диян дурну дур. Му кIушиврий хьхьичIунма лачIунуккун ккаллину ия американчу Кайл Снайдер. Му ххаригума хьуну ивкIун ур, «оьруснал танкалущал» ччалли уккансса сант дирияврия.
Парижлив финалданул чIалачIи бунни вай кIиягу лачIунукку буниялагу сайки ца ххуттай бушиву. Чурххал кIушиву дуцайсса чIумал Снайдердуй ххишаласса килорду диркIун дур, Сяъдуллаевлуй тIурча, кIушиву диялну дакъа диркIун дур.
Финалданийн укканнин Сяъдуллаев ххув хьуну ур Кубанал Рейнерж Переслуяр 3:0 счетращал, яла Гуржиял Элизбар Одекадзеяр – 10:0 счетращал ва Георгий Кетоевлуяр (Армения) – 2:0 счетращал. Снайдергу ххув хьуну ивкIссар цащалва бувксса цинявннаяр. Буккаву къуртал хьун 40 дакьикьа лирчIсса чIумал жула лачIунукку хьхьичI ия 5:4 счетращал, амма 15 дакьикьалул дянив американал муттаэнаща бювхъунни ххувшаву ласун.
Ххув хьун бюхъанссия жула лачIунукку ХIажимурад Рашидовлуща , вагу ивкIссар Аьрасатнал командалуву 61 килорай лачIун уклай. ЧIун дукканнина 11:0 счетращал ххув хьуну ур Венгриянал Джозеф Молнардуяр ва американчув Логан Стибердуяр. Четвертьфиналданий ХIажимурад увккун ур Гуржинавасса олимпий чемпион Владимир Хинчегашвилищал ва ганаяр ххув хьуну ур хъинну захIматсса тагьарданий 5:3 счетращал. Полуфиналданий Рашидов бигьану ххув хьуну ур хьхьичIва Аьрасатнахлу уклай ивкIсса (цувагу аьрасатлуври) Опан Сатлуяр, (цIана му Турциянахлу уклай ур Чингисхан Эрдоган тIисса цIанилу), 8:2 счетращал. Амма финалданий ХIажимурадлун мяркьу хьуну бур – ух хьуну ур Азирбижаннаятусса ХIажи Аьлиевлуяр.
Финалданий ух хьуну ур 65 килорай Польшанахлу лачIун уклай ивкIсса Дагъусттаннал спортсмен МахIаммадмурад ХIажиев Гуржиял Зураби Якобашвилияр 1:3 счет­ращал.
Уттигу ца арцул медаль дур­ххуну дур Аьрасатнал командалувасса аьсатIин Хетан Цаболовлул (74 кило). Му ух хьуну ур американчув Джордан Баррозуяр 9:6 счетращал.
КIира чарвитул медаль ларсун дур Аьрасатнал командалун Алан Гагоевлул (65 кило) ва Владислав Валиевлул (86 кило).
Аьмну командарттавату 1-мур кIану бувгьуну бур США-нал цачIундур командалул (2:2:2) – 54 очко, 2-мур кIанттай дур Аьра­сатнал команда (0-3-2) – 53 очко ва шамулчинмур кIанттай дур Гуржиял команда (2-0-1) – 40 очко.