Дунияллул жагьилтурал дянив — 3-мур кIанттай

[dropcap]А[/dropcap]вгустрал 12-нний бувксса «Илчилул» 32-мур номерданий ду­ссия вара цIанилусса Буйнакскалия­сса МахIаммадов МахIаммадлул Дунияллул чIаважагьилтурал дянив греко-румуллал лачIунбуккаврил чемпионатрай 3-мур кIану бувгьуну бушивриясса баян баву. Ххал арча, МахIаммад ла­кку оьрчI ивкIун ур.

ХIасан Аьдилов
[dropcap]В[/dropcap]а чемпионатрай МахIаммадлул 1-ма муттаэ (соперник) ивкIун ур Италиянавасса лачIунукку, мунаяр МахIаммад ххув хьуну ур 10:0 счетрайну (му марцIну ххув шаврин ккаллиссар). Яла лачIун увккун ур Украиннал вакилнащал, гьамин микку мяркьу хьуну дур жула ватанлувнан: счет цара ца дунугу (6:6), Александр Грушин ххув шаврин ккаллий увну ур. Хъиривма муттаэ хьуну ур Руминнал лачIунукку, ганаяр МахIаммад ххув хьуну ур 8:0 счетрайну. Ганал хъирив жула лакку оьрчI ххув хьуну ур Японнал вакилнаяр 8:0 счет­райну. Ахирданийгу 3-мур кIанттухлу МахIаммад лачIунувккун ур США-нал Тейлор Монт тIисса вакилнащал, ганаяргу ххув хьуну ур 2:1 счетрайну.
МахIаммад МахIаммадов ур Хъусращатусса Назирдул ва Умаматлул арс, цивппа цIана ялапар хъанай бур Щурагь.
МахIаммадлул оьрмулул 10 шин хьусса чIумал, ванал буттал ва увцуну лавгун ур лачIунбуккаврил секциялийн. Цалчинми тIайлабацIуртту хьуну бур Дагъусттаннал чемпионатир­ттай, первенстварттай, амма ми кIицI бан МахIаммадлун ччан къабивкIунни, ми хьхьичIуннайшивурттан ккалли дуллай акъар. Бувсунни Аьрасатнал первенствалий хьуми хьхьичIуннайшивурттая. Масалдаран, 2009 шинал Аьрасатнал чIава жагьилтуран первенствалий 1-мур кIану бувгьуну бур 38 килорал кIушиврий. 2010 шинал Аьрасатнал первенствалий 50 килорал кIушиврий 3-мур кIану бувгьуну бур. Яла, цIунцIия хьуну, шин ва дачIинний лачIун къауклай ивкIун ур. 2011 шинал ялапар хъанан ивкIун ур Москавлив. 2013 шинал 16-17 шинаву ххув хьуну ур кадетътурал пенвенствалий. Муния махъ цаппаралийла ххув хьуну ур Аьрасатнал пенвенстварттай. Яла тIурча, МахIаммад ххув хьуну ур Гуржиянаву шайсса дунияллул халкьуннал дянивсса турнирданий (му ца яла бусравмур турнирданун ккалли­ссар), шикку ххувшаву ларсманахь ихтияр дикIайссар дунияллул жагьилтурал турнирданийн гьан. Му щалва ххуллу бивтссар жула МахIаммад МахIаммадовлул.
Утти сентябрьданий Туркнаву цачIун шаву хьунтIиссар. Яла — Москавлив дунияллул халкьуннал турнир. Мунияр махъ цIусса сезондалийн хIадур хъанантIиссар.
МахIаммад дуклай ур Педуниверситетраву 2-мур курсрай. Ванан дур дурагу 20 шин, щар дурцуну акъар. Ва махъсса ххуттайсса хавар личIину ла­кку душваранссар. Умуд бур жува уттигу МахIаммадлул хьхьичIуннайшивурттая цимилагу чичиншиврийн.