ТIюхчардал шяравугу, ЦIуссалакрал райондалийгу дуллалисса царагу даву чачаннал миллатрал арс Руслан Абакаров хIала акъасса ва чIарав къаавцIусса къашай.

Ци тIилисин буссарив къа­кIулли, чIявусса оьрчIру бу­сса, хъунмасса, захIматшивуртту ккарксса кулпатирттавасса оьрчIру ххуйсса тарбия ларсъсса, хIарачат бусса, чул бищунсса цучIав акъанува, цайнува цивппа гьаз хьусса бикIай. Вана укунсса, 15 оьрчI бусса, кулпатраву хъуна хьусса ур ТIюхчардал шяравасса чачаннал миллатрал арс Руслан Абакаров. Цуксса чумартсса инсантал бухьунссия ванал ппу МахIаммада ва нину ПатIимат тай захIматсса, ккаши-мякьсса шиннардий цала 11 оьрчIал ялун 3 ятин бувцуну, ябувсса. ХIакьинусса кьинигу ТIюхчардал шяраву вай инсантурал цIарду лакралгу, яруссанналгу, цалва чачанналгу бусраврай кIицI лагай. Руслан ва кулпатраву чIана-чIивима арс ур. ЦIана ва ур каши ххисса, тIиртIунийн ка диллалисса ишбажаранчи. Ванал ка-кумаграцIух шиная шинайн цIу дуклай дур ТIюхчардал щар.
Архнияра итталун дагьлай дия шяраваллил диц-куц ххуй дуллалисса, тIутIавун дагьларгсса Русланнул къатри. Шяраваллил жямат­рал бусласимунийн бувну, нажагьссарагу къашайсса дур ваначIа хъамал бакъасса кьини.
«ЦIана нава каши дуну ухьурчангу, каши дакъасса ттул буттал къатлувугу тачIав чан къашай­ссия хъамал. Ниттин ччатI шахьавриха цамунийн иржа биллан къабикIайва. Хъама къабитай шяраву хьхьичIва-хьхьичI телевизор жул буттал лавсун, циняв му ккаккан жучIан занан бикIайва. Къатравун цинявппа къалаглай, телевизор хIаятравун буруган бувну бивхьуну бикIайссия», тIий ур Руслан.
ЧIярусса шиннардий цала нитти-буттал дусшиву диркIсса инсантуращалсса арарду хIакьинусса кьинигу цIакьну ядурну дур вайннал оьрчIалгу. «Къавачалуватур чув уккайсса» учай жула. Ва кулпат­равасса цинявппа оьрчIаягу яхI-къирият дусса, ххаллилсса оьрчIру бувккун бур.
ТIюхчардал шяравугу, ЦIу­ссалакрал райондалийгу дуллали­сса царагу даву Руслан хIала акъа­сса ва чIарав къаавцIусса къашай.
ТIюхчардал школа къуртал бувну махъ, Хасаврайсса Шяраваллил хозяйствалул техникумгу бувккуну, Руслан зий ивкIун ур механикну. Мунияр махъ ва зий ивкIур ур Гудермесливсса автозаправкалий. Мичча байбивхьуну бур ванал бизнесрал ххуллугу. Ва даву канилух дурккун мукьах, шяравун зана хьуну, арендалий аьрщигу ларсун, микку чIирисса заправкагу дурну, зун ивкIун ур. ЦIанасса чIумал ТIюхчардал шяраву Русланнул дурну дур автосервис, кIира заправка, кIива кафе, хозяйствалул ва дуки-хIачIиялул ттучанну, строительствалун аьркинмур дусса база. Вай цимурца шяравура душиврия хъуннасса къулайшинна дур шяраваллил жямат­ран. МуницIунма ванал шяраваллил жяматран 60 инсаннансса зузи кIану дузал бувну бур. Му бакъа­ссагу, ванал райондалул бюджетравун дичлачи­сса налогирттайну асар биллай бур райондалул экономикалул даражалийнгу.
ХIакьину ТIюхчардал школалий бур ванал арцуцIух бувсса, цимурцаннул дузалсса физкультуралул кабинет. Ванал хъуннасса къулагъас дур школалул спортзалданух, чIарав ацIлай ур гьарицагу спортрацIун дархIусса мероприятирттал. Руслан цувагу дуклаки­сса чIумалва спорт ххирасса жагьил ивкIун ур, лачIун-буккаврил бяст-ччаллавух гьуртту хьуну, цимилвагу хьхьичIунсса кIанттурду бугьай­сса бивкIун бур. ЦIанагу ва ххуйсса кумаг буллай ур, спортрал бюхъу бусса оьрчIру итххяххан баву мурадрай. Мукун, Русланнул цимилагу кумаг бувну бур ТIюхчаратусса карате-кекушинкайлухун багьсса «Иппон» клубравасса оьрчIру Аьрасатнал ва дунияллул даражалийсса соревнованиярттайн тIайла буккан. Вава клубравун занази­сса ванал арс РахIим Абакаровлул Екатеринбурграй хьусса Аьрасатнал каратэлул чемпионатрай бувгьуну бур 2-сса кIану. Цува Руслангу ивтун ур «Иппон» клубрал президентну.
Махъсса ппурттуву ва хъунма­сса кумаг буллан ивкIунни «Кижани» тIисса ТIюхчардал волейболданул командалун. Ва командалун ларсунни ванал ххаллилсса форма, ттупру. Цала аякьалийн ларсъсса команда гьуртту хъана­хъисса соревнованиярттал харжлугъгу ванал цала бакIрайн ласай. Ххувшаврил байрандалун хасну хьу­сса волейболданул бяст-ччаллаву кIилчинмур кIану бувгьусса цала командалун Русланнул дуллуну дур 45 азарда къуруш. Ванайн барчаллагьрайсса волейболистуралгу цала формардай чирчуну дур ванал цIа.
ТIюхчардал шяраваллил жагьилтуран бакъассагу, лагма щархъалминнангу ххарисса иш хьунни, Руслан Абакаровлул сайки шанма миллиондалийн бивсса арцу харж дурну, шяраву футболданий бу­ккансса майдан баву. Шяраваллил кIанттурдай жагьилтал спортрахун машхул бансса ххаллилсса давурттив дуллай, ми тIул дакъашивурттая, наркотикирттая, бяйкьу ххуллия арх буцан буллай ур. Утти Русланнун пикри бур ТIюхчардал шяраваллил футболданул командагу сакин дан. ТIюхчардал шяраваллил чIаравсса пострай къуллугъ буллай бур Костромкой областьрал УВД-лул сводный отряд. Аьра­литураха дуллалисса аякьалухлу подразделениялул командалул чулуха Русланнун цимилагу дуллуну дур хIурматрал грамотартту, цIакусса ссятру ва медаллу. Ванал цIаний барчаллагьрал ча­гъарду бувкIун бур Костромской областьрал УВД-лул отрядрал командир, генерал Василий Кукушкиннуя, Костромской областьрал УМВД-лул хъунама, генерал Вадим Казьминнуя, Дагъусттаннайсса Аьрасатнал МВД-лул мобильный отрядрал командир Ю. Завьяловлуя.
Вай гьантрай жу жува бардулт­ну хьуру Руслан Абакаровлул кумаграцIух сакин дурсса республикарттал дянивсса «Дружная Р­оссия» цIанилусса футболданул турнирданул. Турнирданул бахшишран ванал дуллуну дия 100 азарда къуруш. Ва хьунни Чачаннал ва Дагъусттаннал дянивсса дусшиврул арарду цIакь дуллали­сса турнир. Шикку гьуртту хьунни кIирагу республикалиясса 14 команда.
ЦIанасса чIумалгу ванал буллай байбивхьуну бур мюрщи­сса оьрчIру бялахъансса клуб ва оьрчIал багъ, кIира-шанна зивулийсса профилакториялул, банкет­ру бай залданул къатри.
— ТIюхчарату Хасаврайн бияннинсса ххуллий царагу заправка дакъа, инсантал авара хъанай буну, шиккугу заправка дан ччай ура, — тIий, буслай ур Руслан.
Цала дуллалисса ххаллилсса давурттугу Руслан дуллай ур, миллат личIий къабувну, шяраву ялапар хъанахъисса цинявппагу миллатирттал инсантуран.
Шиккува кIицI бан цала душгу Русланнул лккучуннан буллуну бур.
Шяраваллил жяматраха буллалисса къайгъурду бакъассагу, ванал хъунмасса кумаг буллай ур цала аьрщарайсса Аьрасатнал МВД-лул подразделениялул аьралитуран.
ЧIалай бур ца инсаннахьгу хъунмасса бияла бушиву миллатирттал дянивсса дусшиву цIакь дан. ХIакьинусса заманнай ца­ппарассаннал миллатирттал дянив дичин кьаст лахIлахIисса чIумал, Руслан кунмасса инсантурал дуллалисса даврин багьа бищун къашайссар.

А. Аьбдуллаева
И. Саидова