Учинмур бакъар

[dropcap]А[/dropcap]вгустрал 19-нний Къазаннай кIанттул футболданул «Рубин» команда ччалли дурккунни МахIачкъалаллал «Анжилущал».

Руслан Къардашов
Ва тIуркIу хьунни футболданул жула командалул цIуну ивтсса хъунама тренер Вадим Скрипченкол цалчин каялувшиву дуллалисса тIуркIуну. Амма му тIуркIу ххуллул байбихьулуннияр ахирданун лавхьхьусса хьунни. Ххал банну кIивабитулул вярттуву ца ттигу ккулла — янсав бурив, бакъарив. Хъиривмур тIуркIулул чIалачIи банссар хьусса дахханашивуртту командалун мюнпатрайн дуккан най дурив ягу дакъарив.
ТIуркIулул цалчинмур таймрава жула къапулувун ттуп бавкьунни цаннил хъирив ца шамилва.
Жанатаслул кIилва (4,31) ва Карадинезнал цал (15).
КIилчинмур таймрай ялагу ялув бивхьунни шанма ттуп – Набиуллиннул (62), М.Вилал (85) ва Лестьеннул (86). «Анжилул» футболист Яковлев, тIуркIу къуртал хьувкун, тIий ия: «Ял­тту бучIияра, начну буру тамашачитурал хьхьичI, хъиривмур тIуркIулий лажин кIялану зул хьхьичI талан майданнив бу­кканну», — тIий. Шиккува ххи бан, «Анжи» 2002 шиналгу 0:6 счетрай бух хьуссия «Шинник» командалуяр.
«Анжилул» хъиривмур тIур­кIу хьунтIиссар августрал 25-нний МахIачкъалалив «Уфа» командалущал.