Август зурул 18-нний  Дусшиврул къатраву хьунни Ма­хIачкъалалив православиялул собор баврил хIакъиравусса батIаву.

И. Саидова
ДР-лул Миллатирттал по­литикалучIасса Республикалул оьрус мазрал ва культуралул центрданул директор Лариса Кукановал кIицI лавгунни МахIачкъалаливсса Александро-Невскийл храм ва Никольская церковь 50-ку шиннардий бат бувну бивкIшиву.
Ванил бусаврийн бувну, вай иширттал тIааьн бакъасса, хъамакъабитайсса асарду биян бувну бур православиялул диндалул агьулданийн.
— МахIачкъалалив ялапар хъанахъисса агьалинал цIания барчаллагьрай буру Александр Невскийл цIанийсса православиялул собор бансса пикри хьусса Москавуллал Мубараксса Патриарх ва Щалагу Аьрасатнал Кириллуйн, МахIачкъалаллал ва Грозненскаллал Варламлуйн, ДР-лул БакIчи Рамазан АьбдуллатIиповлуйн ва МахIачкъалаллал мэр Муса Мусаевлуйн.
— Храм баврийну «Ак-Гель» парк чIюлу шаву бакъассагу, мунил тасттикь буллалиссар чIяру динну дусса дагъусттаннал миллатрал, цумур дин духьурчагу, тарихрал хIурмат ва кьимат лавайсса бушиву, — увкунни Лариса Кукановал.
Храм бувансса хIукмулия ххари хьушиву ва му православиялул агьулданул оьрмулуву хъуннасса агьамшиву дусса даву хъанахъишиву кIицI лавгуна ДР-лул Оьрус миллатрал агьалинал масъаларттаха зузи­сса ХIукуматрал комиссиялул секретарь Наталья Евсеевал, МахIачкъалаливсса Успенский кафедральный соборданувун заназиминнал.
Ва кьини цаппара журналис­тал бия дуллалимунийн къарши буклаккиссагу. Вайннащалгу ккавккунни шиккува маслихIат.