Аьпагу буручлай, дусшивугу цIакь дуллай

«Лакрал райондалул жагьилтал экстремизмалийн ва терроризмалийн къаршину» тIисса акциялул лагрулий ва нюжмардий Щардал шяраву хьунни экстремистурал каруннища ливтIусса райондалул полицанал зузалтрал аьпалун хас дурсса футболданул турнир.

[dropcap]М[/dropcap]укьилчинсса шинни Аьрасатнал шагьрурдая ватандалийн бигьалаган бувкIсса Щардал ишбажаранчитурал сипталийну ва райондалул администрациялул жагьилтурал ва спортрал комитетрал кабакьаврийну лув-ялув ва турнир дуллай.
Турнир тIитIлатIисса шадлугърай ихтилатру буллалими кIицI лаглай бия турнир дуллалаву цалархIал пашманссагу, ххариссагу иш хъанай бушишиву: пашмансса – агьалинал паракьатшиврул къаралданий бавцIусса жагьилсса арантурал бакIру бат шаву, ххарисса – гайннал аьпа абад бансса сиптачитал бушиву. [pullquote]Экстремистътурал канища ливтIусса полицанал зузалт: Булатов Идрис, Жяъпаров Ниъматуллагь, МахIаммадов ХIусайни, ХIамзатов Абакар, Исмяилов Апанни, МахIаммадов Рамазан, Къунжуев Амсаруллагь, Оьмаров АьлихIусман, Щам­ххалов Мурад.
[/pullquote]
Райондалул администрациялул бакIчинал хъиривчу Ансар Къажлаевлул, Щардал шяраваллил бакIчи Мирослав Ибрагьимовлул, жагьилтурал ва спорт­рал комитетрал каялувчи Малик ХIусмановлул барчаллагь увкуна къучагътурал аьпа абад бан­сса, буттал улчагу, районгу, жула мархригу хъамакъабитансса давурттал сиптачитал ва спонсортал хьусса, цалла цIарду кIицI мадару куну тавакъюгу бувну, даву дуллалисса жагьилтурахь.
Гьуртту хьунни 12 команда: Щардал – шанна команда, Гъумучиял – кIира команда, Ххюлуссуннал, ЧIурттащиял, Хъурхърал, ГьунчIукьатIрал, Хьурттал шяраваллал, ЦIуссаккуллал ва ЦIуссачIурттащиял. Командар­тту сакин хьуну дия шяраваллаву ялапар хъанахъисса ва шагьрурдая бувкIсса жагьилтурая.
ТIуркIу ттигу найнма бур. ДачIифиналданийн дуклай дур Гъумучиял, ЦIуссачIурттащиял, Щардал цалчинмур ва шамилчинмур командартту.
Турнирданул хIасиллая бусанну хъиривмур номерданий.

ХIадур бувссар
Зулайхат Тахакьаевал